AMNTL Konsidera Manorin Kontratadu Vitima Governu Foun

Dili, www.news-viptv.com – Assosiasaun Manorin Nain Timor-Leste (AMNTL) ne’ebe durante ne’e sai mahon ba manorin sira iha Timor-Leste konsidera professor kontratadu ne’ebe governu la kontinua nia kontratu sai vitima governu foun nia politika.

Tamba ne’e, Sekretariu Geral AMNTL, Arlindo Freitas lamenta ho dezisaun Governu nian ne’ebe hapara ou la kontinua professor kontratadu sira ne’ebe balun servisu ona durante tinan lima resin.

“Ami professor sira kada períodu tinan lima ami sempre sai vitima. Tamba ne’e, ami husu nasaun ne’e atu ba oin responsavel ba professor sira ne’e todan tebes tan professor hahoris rekursu umanu oioin ba futuru nasaun Timor-Leste, nusa mak Governate sira la bele halo lei para bele garante professor sira,” hateten Arlindo Freitas ba jornalista sira iha asaun manifestasaun ne’ebe konsentra iha Jadrim B.J Habiebie, Lecidere, Dili, Segunda (22/1/2024).

Nia hateten, wainhira governu hakatak hadia kualidade manorin sira, AMNTL sujere atu fo formasaun ba sira atu bele eleva kapasidade no kualidade iha ensinu aprendijazem laos atu hapara sira.

Professor kontratadu sira hamutuk ho estudante Universidade Nasional Timor Lorosa’e (UNTL) kontinua ejiji ba Ministeriu Edukasaun atu rezolve problema manorin sira ne’ebe nia kontratu governu la kontinua.

“Governu la solusiona problema refere nafatin sei halo manifestasaun hamutuk ho sosiedade sivil no intidade relevante nune’e bele resolvidu,” nia dehan.

Porta Voz Professor Kontratadu, Agostinho Pinto hateten, sira ejiji nafatin atu Ministeriu Edukasaun rezolve sira nia preokupasaun, tamba antes ne’e sira nia naran publika ona iha Jornal da Republika sira nia estatutu no sei rejeita teste foun ba sira.

“Ami sei la partisipa teste tamba antes ne’e ami hetan ona kontratu husi Ministeiru Edukasaun liu hosi prosesu naruk ida no ami prense rekezitu barak ne’ebe Ministeiru Edukasaun estabelese tan ami nia naran no lista publika iha Jornal da Republika nu’udar dokumentu ofisial estadu nian nune’e ikus mai Ministeiru Edukasaun rekoñese hanesan professor kontratadu, programa tes ba kandidatu ne’e ami konsidera só vale ba hirak ne’ebe seidauk tama iha sistema kuadru Ministeiru Edukasaun nian mak bele tuir teste,” deklara Agostinho Pinto iha nia asaun manifestasaun.

Tuir nia, politika ne’ebe dadaun Governasaun dasia ba Professor Kontratadu konsidera impede kontratadu tinan 2022 no tinan 2023 la registu iha avaliasaun desempeñu iha sikaap tamba ne’e professor hirak ne’e konsidera Ministra Edukasaun viola dekretu lei nú 31/2023 iha artigu 38 kona-ba avaliasaun desempeñu no dekretu lei nú. 19/2011 8 de jullu kona-ba regime avaliasaun traballador administrassem funsaun publika.

“Ami konsidera politika nono Governu paraduksu tamba prevê orasamentu 10% ba Ministeiru Edukasaun tenki hapara professor lubun, dezisaun nono Governu nian liuhusi Ministeiru Edukasaun lori impaktu negativu ba iha estudante hotu-hotu liuliu povu kiik no kiak nian oan sira iha territóriu Timor laran tomak,” nia dehan.

Wainhira Ministeriu Edukasaun la hasai karta formal ba sira nia ejijensia mak manorin nain sira kompromete katak sei korta ba konkursu refere.

“Se Ministra Edukasaun la hatun karta notifkasaun legal pro eskrita ruma mak ami sei hamutuk ho entidade hotu halo buikota ba programa pós-kandidatu husi Ministeiru Edukasaun, ami sei boikota tomak rekrutamentu ne’ebe loke husi Ministeiru Edukasaun nune’e fo biban hodi resolve uluk professor kontratadu, reklamante no voluntariu sira nian tuir dezisaun primeiru Ministru nian, Ami professor kontratadu kontratadu sira tinan 2022 no tinan 2023 registe nafatin hodi diskorda no sei lá tuir teste husi Ministeiru Edukasaun ne’ebe sei fo sai,” haktuir Agostinho.