Xefi Estadu Oferese Bolsu Estudu Holanda ba Estudante 6 ETV Don Bosco Maumali

MALIANA, www.news-viptv.com – Xefi Estadu promote sei oferese bolsu estudu Holanda ba estudante nain 6 iha Eskola Téknika Vokasionál (ETV) Don Bosco Maumali iha Maliana, Munisipiu Bobonaro.

Prezidente Repúblika, J. Ramos-Horta anunsia bolsu estudu ne’e ba eskola refere hafoin haree diretamente progresu no kontribuisaun eskola ne’e nian iha dezenvolvimentu edukasaun téknika iha Timor-Leste.

Iha nia deskursu, Prezidente Ramos-Horta hateten katak nia sei fasilita oportunidade ba estudante sira atu estuda iha Amsterdam-Holanda, inklui proposta inicial ba estudante nain 6 (mane 3 no feto 3) husi eskola refere, posibilidae sei ba tuir bolsa estudu hamutuk estudante nain 30 seluk hodi bele eskola iha rai liur.

“Ohin hau mai iha ne’e, Se Padre sira bele hili Estudante sira, ita hahu ho estudante nain 6 (feto nain 3 no mane nain 3) atu bele estuda iha Akademia ida iha Amsterdam Holanda, hau sei konfirma didiak lai iha nivel saida, estudante ne’ebé remata ona iha Décimo ano no tenke Koalia lian Inglés, se lakoalia lian Inglês bele tuir Kursu iha Dili, hau bele selu imi nia kursu lian Inglês nian,” hateten xefi estadu iha nia enkontru ho estudante sira, Kuarta (8/4/2026).

Prezidente encoraja estudante sira atu dedika sira nia an no foka iha área estratéjika hanesan Siénsia, Teknolojia, Medicina, Finansas no Artifisial intelijénsia, hodi responde ba dezafiu globál no mudansa desenvolvimentu ohin loron nian.

Diretór E.T.V Don Bosco Maumali, Irmaun Marçal Amaral, SDB, hatete katak estabelesimentu eskola ne’e mai husi inisiativa Prezidente Ramos-Horta rasik iha nia mandatu primeiru momentu ne’eba. prezidente husu apoiu ba Governu Spaiña atu kontribui iha edukasaun Timor-Leste. Tuir kooperasaun entre Governu no Kongregasaun Salesiana, eskola ne’e estabelese ofisialmente tuir akordu iha loron 10 Marsu 2010 no hahú atividade Akademia iha 7 Janeiru 2014 ho estudante primeiru nain 30 deit ne’ebé aprende iha iha área eletrisidade.

Desde eskola ne’e hatudu progresu signifikativu, ho total graduadu hamutuk 247 husi tinan 2016 – 2024 no pursentu 57,9% sira hetan ona servisu. Iha tinan 2024, IX Governu liu husi Ministériu Edukasaun aprova tan departamentu foun Jestaun Téknika Informatika, ho total estudante husi Departamentu rua ne’e agora hamutuk nain 164.

Eskola mos oferese internatu ba estudante sira husi munisípiu hotu no implementa programa sosial “Involvimentu iha Komunitáriu”, ne’ebé estudante sira fó servisu voluntáriu hadia instalasaun eletrisidade iha komunidade sira ho gratuitamente.

Maske nune’e, diretór eskola hatete katak dezafiu importante sei iha, liu-liu preparasaun akademika estudante sira husi nivel báziku no menus iha rekursu ekipamentu. Maibé Eskola kontinua investe nafatin iha kapasitasaun profesór sira nian, liu husi fó formasaun iha UNTL.

“Dezafiu ne’ebe ami hasoru, aliende dezafiu Ekipamentu pessoal, tuir ami nia Observasaun nia Avaliasaun ba ita nia oan sira mai husi Ensino Primario sira nia preparasaun ladun forte liu, ami nia observasaun katak Kúrikulu husi Departamentu Vocasional ladun máximu, ami bele dehan husi estudante sira ne’e bele too deit 50%-60% maka’as ona maibé iha tempu seluk ami hakaas-an atu estudante husi Primeiru ano sira, repete hikas Materia Base aritmátika-Matemátika, ne’ebé tuir lolos sira aprende ona iha nivel Bázika.”

Iha okaziaun ne’e, Prezidente Ramos-Horta entrega mos fasilidade desportu ba eskola refere no husi parte eskola entrega prezente simbóliku hanesan estatua “Maria Auxiliadora dos Cristãos” nu’udar símbolu fiar no edukasaun.

Vizita ne’e reafirma komprimisu Estadu nian atu promove edukasaun vokasionál nu’udar motor fundamental ba dezenvolvimentu rekursu umanu iha Timor-Leste.