Ministra Adaljiza Magno Simu delegasaun Indonesia ba Pilar Ekonomia Nian

DILI, www.news-viptv.com – Ministra Negosiu Estranjeiru no Koperasaun, Adaljiza Magno simu delegasaun ba Pilar Ekonomia hosi Indonesia ne’ebe lidera hosi Ministeriu Negosiu Estranjeiru no Ministeriu Komersiu Indonesia nian hamutuk ho embaixada Indonesia iha Timor-Leste hodi hare’e preparasaun Timor-Leste nia ba adezasaun ASEAN.

Iha inkontru ne’e, partisipa mos Diretora jeral assuntu ASEAN Milena Rangel ho nia estrutura, tuir Ministra Adaljiza hateten vizita delegasaun Indonesia nian ne’e pozitivu tebes no importante tamba bele ajuda Timor-Leste nia prosesu adezaun wainhira Indonesia asumi presidensia ASEAN nian tinan oin.

Ministra mos hateten, to’o ohin loron Timor-Leste sedauk bele sai membru ASEAN, tamba iha asuntu komersiu ne’ebe Timor-Leste persiza adapta iha Sistema ASEAN laran, inklui merkadu livre nian ne’ebe nasaun membru ASEAN avansadu los ba asuntu ne’e.

Maski sedauk sai membru ASEAN, ministra Adalgiza informa, Timor-Leste iha ona progressu ba prosesu nia adezaun, inklui iha komersiu nian no fiar katan iha tempu besik Timor-Leste bele ona simu nudar membru nasaun ASEAN nian.

Timor-Leste iha nia adezaun ba ASEAN hatama ona proposta adezasaun desde tinan 2011.

ASEAN nudar organizasaun rejional id aba nasaun sira iha sudeste aziatiku ne’ebe dadaauk ne’e hamutuk nasaun 10 maka Indonesia, Malaysia, Singapura, Filipina, Thailandia, Vietnam, Kambodia, Laos, Myanmar no Brunei Darussalam

Reporter: Mario Fili I Cameraman: Gantry Meilana