Polandia Prontu Ajuda Timor-Leste iha Setor Edukasaun

DILI, www.news-viptv.com – Polandia iha selebrasaun tinan 20 relasaun diplomatika ho Timor-Leste pronto ajuda tan dezemvolve setor edukasaun iha Timor-Leste.

Komitmentu Polandia ne’e hato’o hosi Embaixadora Polandia mai Timor-Leste, Slawomir Stanislaw hafoin hasoru malu ho Prezidenti Republika, Jose Ramos Horta, Segunda (23/5/2022), iha Palasiu Prezidensial Bairo Pite, Dili.

“Hau mai iha Timor-Leste durante semana ida no hasoru malu ona ho ema barak, espesial ho Dr. Jose Ramos Horta nudar prezidenti foun. Ami mos halo ona diskusaun kona ba dialogu politika entre Polandia ho Timor-Leste, inklui koperasaun ekonomia, mediku, agrikultura no enerjia no hau mos espera Polandia bele halo liu tan, espesial liu tinan nee ami selebra tinan 20 relasaun diplomatiku nian entre Polandia ho Timor-Leste, ne’ebe ami hanesan ona kolega diak no sei halo barak liu tan iha setor oi-oin, inklui iha setor edukasaun, edukasaun vokasional, ne’ebe ami hakarak dezemvolve liu tan edukasaun iha Timor-Leste,” dehan Slawomir Stanislaw, Embaixadora Polandia.

Embaixadora ne’e mos kongratula povu Timor-Leste ne’ebe realiza ona eleisaun prezidensial ne’ebe sai ezemplu ba dezemvolvimentu demokrasia iha mundu.  

“Hau atu hateten eleisaun prezidensial foun lais ne’e sai ezemplu ba dezemvolvimentu demokrasia, observador internasional mos hare ida ne’e, ami respeitu tebes imi nia dezemvolvimentu demokrasia. Maski hanesan nasaun foun, maibe iha tinan 20 ne’e ami hare Timor-Leste iha ona maturidade iha demokrasia, Polandia sempre apoiu ba ida ne’e,” dehan Slawomir Stanislaw, Embaixadora Polandia.

Reporter: Natalina Martins  I  Cameraman: Justinho Mendonca