Henrique da Costa KomJer foun PNTL

DILI, www.news-viptv.com – Eis Komandante Polisia Nasional Timor-Leste (PNTL) Munisipiu Dili, Superintendente Xefi Henrique da Costa sei troka Komisariu Faustino da Costa nu´udar Komandante Jeral (KomJer) foun PNTL.

“Aprova projetu Rezolusaun Governu, aprezenta husi Ministru Interiór kona-ba nomeasaun ba Superintendente-Xefe Henrique da Costa atu ezerse kargu Komandante-Jerál Polísia Nasionál Timor-Leste (PNTL), ba períodu tinan tolu, tanba ne’e, pomove ba Komisáriu-Jerál. Ho Rezolusaun ne’e  ida-ne’e, nune’e hapara komisaun servisu atuál komandante-Jerál PNTL, komisáriu Faustino da Costa,” hakerek Komunikadu imprensa ne´ebe fo sai hosi Konsellu Ministru, Kuarta (15/3/2023).

Alende hili Henrique da Costa ba Komjer foun, hili ona Superintendente Xefi Pedro Belo ba kargu segundu KomJer PNTL.

“Konsellu Ministrus aprova projetu Rezolusaun Governu, ne’ebé mós aprezenta husi Ministru Interiór hodi nomea Superintendente-Xefe Pedro Belo atu ezerse kargu Segundu Komandante-Jerál PNTL, ba períodu tinan tolu, ho nune´e promove ba Komisáriu. Ho Rezolusaun Governu nian ida-ne’e hapara mós komisaun servisu Komisáriu Mateus Fernandes,” hakerek komunikadu ne´e.