DILI, 20 Novembru 2026 (VIP TV) – Rede Aziátika ba Eleisaun Livre (ANFREL) hato’o apresiasaun ba progresu demokrátiku Timor-Leste nian no reafirma ninia interese atu haruka misaun observasaun eleitorál ba eleisaun sira iha futuru, bainhira hetan konvite husi autoridade eleitorál kompetente.
Intensaun ne’e sai durante enkontru entre Prezidente Repúblika, José Ramos-Horta, ho delegasaun ANFREL iha Palásiu Prezidensiál Nicolau Lobato, Dili, iha loron 20 Novembru 2026.
Delegaasaun ANFREL ne’e lidera husi Diretora Ezekutiva, Brizza Rosales, hamutuk ho Ofisiál Programa Sénior, Dr. Manjesh Rana. Enkontru ne’e foka ba dezenvolvimentu demokrátiku Timor-Leste nian no preparasaun ba siklu eleitorál sira ne’ebé sei mai.
Iha diskusaun ne’e, parte rua avalia situasaun eleitorál atual, inklui lakuna no dezafiu sira ne’ebé bele mosu, no buka oportunidade atu hametin kapasidade observasaun eleitorál doméstika.
ANFREL fó atensaun espesífika ba nesesidade atu dezenvolve kapasidade observadór eleitorál doméstiku sira, hodi kontribui ba transparénsia no kredibilidade prosesu eleitorál iha Timor-Leste.
Diskusaun ne’e mós inklui preparasaun ba eleisaun prezidensiál, parlamentár no Governu Lokál iha futuru.
Prezidente Ramos-Horta fó benvindu ba advokasia no kompromisu kontinuadu ANFREL nian atu apoia no promove prosesu demokrátiku iha Timor-Leste.
Iha enkontru ne’e, delegasaun ANFREL louva progresu demokrátiku Timor-Leste nian, ne’ebé konsidera nu’udar ezemplu inspiradór ba rejiaun Ázia.
Organizasaun ne’e reafirma mós ninia intensaun atu haruka misaun observasaun eleitorál ba Timor-Leste, bainhira simu konvite husi autoridade eleitorál sira.
Enkontru ne’e hatudu importánsia kooperasaun entre instituisaun nasionál no organizasaun rejionál sira atu kontinua hametin demokrasia, transparénsia no kredibilidade prosesu eleitorál.
Timor-Leste kontinua hametin ninia kompromisu ba sistema demokrátiku, ho preparasaun ba siklu eleitorál sira ne’ebé sei mai, nu’udar parte importante husi konsolidasaun demokrasia iha nasaun ne’e.
ANFREL Louva Progresu Demokrátiku Timor-Leste













