ABU DHABI, (VIPTV) – Prezidente Repúblika Timor-Leste, José Ramos-Horta, to’o ona iha Abu Dhabi, Emiradus Árabes Unidus (EAU), hodi hala’o vizita Estadu ho objetivu prinsipál atu hametin relasaun bilateral no loke oportunidade foun ba komérsiu, investimentu no dezenvolvimentu ekonómiku entre nasaun rua.
Vizita ne’e hala’o husi loron 12 to’o 16 Novembru 2026, tuir konvite husi Prezidente EAU, Sheikh Mohamed bin Zayed Al Nahyan. Vizita ne’e sai parte importante husi esforsu diplomátiku Timor-Leste atu haforsa ligasaun ho nasaun sira iha rejiaun Golfo no atrai parseiru internasionál ba dezenvolvimentu nasionál.
Iha nia to’o iha Aeroportu Internasionál Abu Dhabi, Prezidente Ramos-Horta hetan simu ofisiál husi Ministru Estadu EAU, Saeed Bin Mubarak Al Hajeri, hamutuk ho Embaixadór Timor-Leste iha EAU, Rui Manuel Hanjam, no Embaixadór EAU naun-rezidente ba Timor-Leste, Abdulla Salem Al Dhaheri.
Durante vizita ne’e, Prezidente Ramos-Horta sei hala’o enkontru nivel aas ho Prezidente EAU, Sheikh Mohamed bin Zayed Al Nahyan, atu diskute dalan sira hodi hametin parseria estratéjika no identifika área kooperasaun foun ne’ebé bele lori benefísiu konkretu ba povu nasaun rua.
Antes enkontru bilateral ne’e, Prezidente sei halo konsultasaun ho Ministru Estadu ba Negósiu Estranjeiru EAU, Noura Al Kaabi, no enkontru ho líder negósiu, Salah Sharaf, hodi buka oportunidade atu haforsa relasaun komersiál no esplora possibilidade investimentu entre nasaun rua.
Área sira ne’ebé iha potensiál atu dezenvolve inklui infraestrutura, enerjia renovável, turizmu, lojístika, saúde, edukasaun no dezenvolvimentu rekursu umanu. Setór hirak ne’e bele sai oportunidade importante ba Timor-Leste atu diversifika ekonomia no aumenta partisipasaun investidór estranjeiru.
Iha deklarasaun antes enkontru bilateral, Prezidente Ramos-Horta subliña katak Timor-Leste valoriza tebes amizade ho Emiradus Árabes Unidus no hein katak vizita ne’e bele loke dalan ba kooperasaun foun.
“Ha’u sente onra boot tebes tanba bele mai iha Abu Dhabi no hasoru Sua Alteza Prezidente Emiradus Árabes Unidus. Timor-Leste valoriza tebes amizade ne’ebé iha ho EAU, no ha’u hein ho expetativa aas katak diskusaun sira ne’e sei hametin liután relasaun bilateral no loke dalan kooperasaun foun entre nasaun rua no povu rua.”
Prezidente mós hateten katak apoiu husi EAU iha ona kontribuisaun importante ba dezenvolvimentu nasionál Timor-Leste, no Governu kontinua kompromete atu aprofunda amizade no kooperasaun ne’e ba benefísiu komún.
Kooperasaun entre nasaun rua la’ós foun. Iha fulan Agostu 2026, Prezidente Ramos-Horta simu Ministra Estadu EAU, Noura Al Kaabi, iha Palásiu Prezidensiál Nicolau Lobato, Dili. Enkontru ne’e marka pasu importante ida iha relasaun bilateral, inklui apoiu ba projetu rezidénsia estudante feto universitária hamutuk ho fasilidade sosiál iha Dili, ne’ebé sei fó alojamentu ba estudante feto universitária besik 300.
Aleinde ne’e, Timor-Leste no EAU mós iha interese atu haforsa kooperasaun iha área edukasaun, formasaun diplomátika no dezenvolvimentu kapasidade institusionál.
Iha parte seluk, Prezidente Ramos-Horta sei halo vizita ba sede Zayed Award for Human Fraternity, iha Etihad Towers, hodi fó omenajen ba Juís Mohamed Abdelsalam, Sekretáriu-Jerál organizasaun ne’e, nu’udar rekoñesimentu ba nia kontribuisaun iha promosaun fraternidade umana.
Vizita Estadu ne’e hatudu esforsu Timor-Leste atu haforsa diplomásia ekonómika, buka merkadu foun, atrai kapital estranjeiru no kria oportunidade dezenvolvimentu sustentável.
Ba Timor-Leste, relasaun ho EAU iha potensiál atu sai ponte importante ida entre ekonomia nasionál no merkadu internasionál, liuliu iha tempu ne’ebé nasaun kontinua buka dalan atu diversifika fonte rendimentu no hametin baze ekonomia.
Prezidente Ramos-Horta nia vizita traballu iha Abu Dhabi sei remata iha loron 16 Novembru 2026, antes nia kontinua viajen ba Denpasar, Bali, Indonézia, no fila fali ba Timor-Leste iha loron 17 Novembru.
