Hasoru PR Horta, Kim Chan-Beom Koalia Relasaun Bilateral Koreia Sul ho TL

DILI, www.news-viptv.com – Prezidenti Republika (PR) Jose Ramos-Horta simu Enviadu Espesial Ministru Negosiu Estranjeiru Koreia Sul, Kim Chan-Beom ne´ebe mai vizita iha Timor-Leste hodi hare´e progressu koperasaun entre nasaun rua ne´e.

Iha hasoru malu ho xefi estadu, Kim Chan-Beom esplika posibilidade atu upgrade relasaun bilateral entre nasaun rua ne´e iha asuntu ekonomia, dezemvolvimentu, no traballador. 

“Ohin ami mai hasoru malu laureadu nobel da paz ida, ema ida promotor ba demokrasia, ema id a ne´ebe amigu kleur Koreia Sul nian, ami ekipa enviadu espesial ministru negosiu estranjeiru Koreia Sul nian ne´ebe mai atu upgrade tan relasaun ne´ebe Timor-Leste ho Koreia Sul iha ona durante ne´e,” dehan Kim Chan-Beom ba jornalista sira hafoin hasoru malu ho PR Horta, Kuarta (15/3/2023) iha Palasiu Prezidensial, Dili.

Alende koalia kona ba koperasaun entre nasaun rua, koalia mos kona ba asuntu indo pasifiku nian, inklui pozisaun Koreia Sul ne´ebe apoia Timor-Leste ne´ebe sai ona membru ASEAN maski ho estatutu observador.

“Maski observador, maibe ami hakarak Timor-Leste bele sai full member ba ASEAN nune´e mos ba WTO,” enviadu espesial ne´e komenta.

Enviadu espesial ne´e mos afirma katak iha tinan 2023, Governu Koreia Sul mos hasa´e qouta traballador Timoroan ne´ebe sei servisu iha fabrika ba ema nain 1.000 hosi 500 antes ne´e.

Nia mos informa, nia ekipa iha Kinta (16/3/2023) sei hasoru Ministra Negosiu Estranjeiru no Koperasaun Adaljiza Magno hodi koalia asuntu balun ba koperasaun bilateral nian hanesan iha setor privadu hodi oinsa lori investor Koreia Sul mai investe iha Timor-Leste no mos asuntu edukasaun no apoia ba Timor-Leste nia membership iha ASEAN.