Timor-Leste Apoia US$ 100.000 ba Servisu Sekretariadu Tekniku ASEAN

DILI, www.news-viptv.com – Governu Timor-Leste liu hosi Sorumutuk Konsellu Ministru 16 Agostu 2023 delibera ona hodi fó kontribuisaun ida ho valór US$ 100.000 ba Sekretariadu Tékniku ASEAN, iha Jakarta, ba despezas administrativas. 

“Konsellu Ministru diskute mos oinsa atu apoiu sekretariu tekniku ASEAN iha Jakarta ho osan montante dolar amerikanu rihun atus ida,” informa Ministru Prezidensia Konsellu Ministru, Agio Pereira ba jornalista sira, Kuarta (16/8/2023), iha Palacio do Governo, Dili.

Alende desidi apoia osan ba sekretariadu tekniku ASEAN, Konsellu Ministru mos aprova projetu Dekretu-Lei, ne’ebé aprezenta husi Primeiru-Ministru, Kay Rala Xanana Gusmão, ba alterasaun daruak kona-ba Dekretu-Lei nu. 6/2018, loron 14 fulan-marsu, hodi fiksa Valór Subvensaun ne’ebé fó husi Estadu ba Kandidatus Prezidénsia Repúblika ba Kampaña Eleitorál.

Objetivu husi alterasaun ida-ne’e mak atu permite hodi fó kompensasaun ba kandidatus Prezidénsia Repúblika iha situasaun sira ne’ebé maka presiza hodi realiza votasaun ba daruak nian, iha ámbitu eleisoins prezidensiais ne’ebé hanesan, no determina katak valór subvensaun ne’ebé atu selu ba kada kandidatu ba realizasaun votasaun daruak nian, sei selu ba kandidatus ida-idak ne’ebé partisipa iha votasaun daruak sei selu iha totalidade hosi votus ne’ebé sira hetan ona iha votasaun daruak.

“Ita hotu hatene prezidenti nia vota dalarua ou segunda ronde, tan ne’e konsellu ministru altera tia dekretu lei subvensaun ne’e hodi votos hot-hotu konta ba eleisaun presidensial,” hateten Agio Pereira.

Nune’e mos nia informa, Konsellu Ministru mos aprova projetu Dekretu-Lei, ne’ebé aprezenta husi Ministru Agio Pereira, ne’ebé aprova Orgánika Prezidénsia Konsellu Ministrus.

Iha komunikadu imprensa ne’ebe publika hosi portal official governu, Prezidénsia Konsellu Ministrus maka departamentu sentrál Governu nian ne’ebé prezide husi Primeiru-Ministru, hetan tulun husi Ministru Prezidénsia Konsellu Ministrus, ne’ebé responsavel hodi fó apoiu ba Konsellu Ministrus no membru Governu sira seluk ne’ebé integra iha Governu ida-ne’e, nune’e mós atu promove koordenasaun interministeriál Governu nian, liuhusi ninia órgaun sira, husi gabinete apoiu ida-idak no husi asesorias, servisus integradus iha administrasaun direta Estadu nian no pesoas koletivas ne’ebé integra iha administrasaun indireta Estadu nian.

Konsellu Ministrus aprova mós aprova Orgánika Ministériu Negósius Estranjeirus no Kooperasaun nian, Ministériu Justisa, Ministériu Saúde, Ministériu Obras Públikas, Ministériu Solidariedade Sosiál no Inkluzaun, no Ministériu Petróleo no Rekursus Minerais.