ETDA Sei Haruka Timoroan Servisu iha Brunei

DILI,  www.news-viptv.com –  East Timor Development Agency (ETDA) nudar ajensia formasaun ida iha Timor-Leste ne´ebe fo formasaun barak ba Timoroan sira sei haruka nia estudante hodi servisu ba Brunei Darussalam.

Ho koperasaun ne´ebe ETDA halo ona ho Timorense Main Power (TMP) nudar ajensia traballador hosi Brunei ne´ebe sei haruka Timoroan sira servisu iha Brunei, foin lais ne´e ETDA hetan vizita servisu hosi Ministra Negosiu Estranjeiru no Kooperasaun, Adaljiza Magno ho Embaixador Brunei ba Timor-Leste, Wan Hadfi Lutfan Bin Haji Abdul Latif.

Vizita Ministra Magno ho Embaixador Wan Latif ne´e simu deretamente hosi Diretor ETDA, Januario Maria Neto Mok. Iha nia apresentasaun, Januario esplika katak ETDA hanesan fatin treinamentu ne´ebe fo formasaun ba joven sira ho nível edukasaun oioin iha área lingua (Ingles ho Portugues), administrasaun, hospitalidade, tour guide, ceramic no Creative Thinking.

Ho formasaun ne´ebe iha maka ETDA hetan fiar hodi halo rekrutamentu be Timoroan sira ne´ebe hakarak servisu iha Brunei iha área Hospitality, food beverage no domestic, agriculture ho farming livestock, manufacture – process worker, mechanics and assembly line, construction – bricklayers, electricians and carpeternters.

“Liu husi rekrutamentu publiku hare’e liu ba sira ne’ebe iha esperensia horticulture no driver nian, ba hospitality rekrutamentu ida ne’e perioridade liu-liu ba estudante ETDA,‘’ hatete Januario ba Jornalista sira, Kinta (11/08/2022).

Hare´e ba servisu ETDA nian, Ministra Magno promessa sei promove programa ETDA ba nasaun seluk ne´ebe hakarak simu traballador Timoroan liu hosi formasaun ne´ebe ajensia ne´e halo.

“Hau sei promove liu tan saida maka ETDA halo ba pais sira seluk tan hodi ida ne’e bele haruka Timor oan tamba to´o agora Timoroan barak maka persija servisu,” dehan Ministra Magno.

Tuir planu, Timoroan sira ne´ebe sei servisu ba Brunei sei aranka iha fim Agostu fulan neé.

Alende Brunei, liu hosi koperasaun ne´ebe governu fasilita, Timoroan barak maka servisu ona iha Australia no Koreia Sul.