DCC Konvida Fiar-Na’in Kristu Sira Atu Halo Orasaun Ba Malu, La’os Julga Malu

Dili, www.news-viptv.com) – Dili City Church (DCC) konvida fiar-na’in kristu sira atu harii moris igreja ne’ebé nakonu ho domin, kuidadu no orasaun, liu husi hametin malu, la’ós atu hamonu malu ka julga ema seluk ne’ebé hasoru problema no difikuldade iha moris.
Mensajen ida-ne’e hato’o husi Diakonu Agida Dos Santos iha pregasaun kultu domingu Dili City Church, ihaDelta Comoro, Domingu (8/11), ho baze ba Liafuan Maromak iha livru Roma 2:1 no Tiago 5:16.

Iha nia pregasaun, Diakonu Agida enfatiza katak fiar-na’in ida-idak labele lalais fó julgamentu ba ema seluk bainhira haree sala ka fraqueza iha sira-nia moris. Nia bolu sarani atu hatudu domin, fó apoiu no lori malu ba Maromak liuhusi orasaun.
Bazeia ba Roma 2:1, nia fo hanoin ba sarani sira labele konsidera an rasik loos liu ema seluk no lalais julga ema seluk, tanba ema hotu iha fraqueza no presiza Maromak nia grasa no perdua.
“Nu’udar ema Kristaun, ita tenke hametin malu no halo orasaun ba malu, la’ós atu hamonu malu, liuliu to’o halo julgamentu ba ita-nia maluk. Bainhira ita haree ita-nia maun-alin ida halo sala, labele lalais julga nia, maibé lori nia iha orasaun. Bainhira iha ema ida ne’ebé hasoru susar ka moras, ita tenke iha besik atu hametin no halo orasaun ba nia. Tanba ita-nia knaar la’ós atu hamonu ema seluk, maibé ajuda sira atu hamriik fali no hetan restaurasaun iha Maromak,” nune’e mak mensajen ne’ebé Diakonu Agida hato’o iha nia pregasaun.
Nia mós fó hanoin katak ema ida-nia sala labele sai razaun ba ema seluk atu hamoe nia ka fahe nia fraqueza ba ema hotu. Nu’udar fiar-na’in, ita tenke sai parte husi prosesu restaurasaun liuhusi orasaun, atensaun no apoiu ne’ebé konkretu.
Nia esplika katak liuhusi Tiago 5:16, Liafuan Maromak hanorin fiar-na’in sira atu konfesa sala malu no halo orasaun ba malu, atu hetan kura no restaurasaun.
“Liafuan Maromak hanorin ita atu labele julga ema seluk, tanba ita hotu iha fraqueza no presiza Maromak nia grasa. Bainhira ita haree ema ida halo sala, monu, hasoru problema ka moras, ita-nia knaar la’ós atu fahe nia sala ka hamoe nia iha ema seluk nia oin, maibé atu ajuda nia liuhusi domin no orasaun. Yakobus 5:16 fó hanoin mai ita atu konfesa sala malu no halo orasaun ba malu atu hetan kura. Tanba ne’e, nu’udar ema Kristaunn, ita tenke sai instrumentu restaurasaun ba ema seluk, la’ós sai razaun ne’ebé halo sira hetan kanek no terus liután,” nia dehan.
Diakonu Agida mós subliña katak bainhira ema ida halo sala, resposta ne’ebé loos la’ós atu kritika, hamoe ka hamonu nia, maibé atu halo orasaun ba nia, hodi nia hetan kbiit atu muda an no fila fali ba dalan loos iha Maromak nia oin.
Nune’e mós, bainhira ema ida hasoru susar, problema família, presaun moris ka moras, kongregasaun tenke iha besik atu fó apoiu liuhusi orasaun, atensaun no asaun konkretu.
“Tiagu 5:16 hanorin ita atu halo orasaun ba malu. Bainhira ema ida halo sala, halo orasaun ba nia. Bainhira ema ida hasoru susar, hametin nia. Bainhira ema ida moras, vizita no halo orasaun ba nia. Tanba nu’udar fiar-na’in, ita-nia misaun la’ós atu julga ema seluk, maibé atu hadomi, halo orasaun no ajuda malu atu hetan restaurasaun iha Maromak,” dehan Agida hato’o hodi fó hanoin ba sarani sira.
Liuhusi pregasaun ida-ne’e, konvida sarani sira atu la’ós de’it rona Liafuan Maromak, maibé aplika mós iha moris loroloron, iha ambiente igreja, família no komunidade.
Mensajen prinsipál husi kultu dominggu ne’e mak fiar-na’in sira tenke sai fonte kbiit no restaurasaun ba ema seluk. Bainhira ema ida monu, ita tenke estende liman atu ajuda nia hamriik fali, la’ós aumenta nia todan liu husi julgamentu. Tanba domin tenke boot liu duké hakarak julga ema seluk.

Dili City Church mak ministériu ida iha Igreja Church of Pentecost (COP) Global, ne’ebé hetan lidera husi Pastor Evangelisto Gantry Dos Santos Meilana. Liuhusi servisu no hanorin Liafuan Maromak, DCC kontinua promove kresimentu fiar, unidade no moris espirituál iha kongregasaun.