PRRamosHortaLansa LivruTinan 50 Independensia Timo-Leste Nian

Iha intervensaun, Xefe Estadu felisita atór sira, akadémiku husi Universidade Nacional Timor Lorosa’e (UNTL), ba rigór iha investigasaun no ba kualidade publikasaun. Prezidente klasifika livru ho pájina 370 ne’e nu’udar instrumentu edukativu ne’ebé esensiál ba foin-sa’e sira iha nasaun laran no rekursu krítiku ida atu forma futuru líder sira, subliña estuda susesu no dezafiu sira husi pasadu mak vitál ba prosesu konstrusaun estadu no dezenvolvimentu nasionál.

Prezidente Ramos-Horta mós halo refleksaun kona-ba dalan istóriku no diplomátiku ne’ebé kompleksu hodi to’o Timor-Leste iha loron ohin, no hanoin fila-fali reziliénsia povu timoroan ne’ebé hasoru dezafiu sira durante períodu Guerra Fria, okupasaun no krize oioin iha prosesu konstrusaun nasaun. Prezidente dehan ho orgullu katak ohin loron Timor-Leste hela iha períodu konsensu polítiku no estabilidade institusionál, liuliu iha área polítika esterna no asaun umanitária. Maski seidauk iha kapasidade hotu-hotu, Timor-Leste kontinua aumenta nia kredibilidade iha nível internasionál tanba iha vizaun estratéjika ida ne’ebé fahe hamutuk husi instituisaun prinsipál Estadu nian.

Iha finál serimónia, Prezidente Repúblika ko’alia kona-ba asuntu relasiona ho aeronave ida ne’ebé to’o iha Timor, no reafirma fila-fali katak Prezidénsia Repúblika kontinua komprometidu ho transparénsia no integridade institusionál. Prezidente klarifika katak Prezidénsia la-konvida aeronave refere ne’e no la-fó autorizasaun ba ema ka entidade ruma atu uza naran Prezidente Repúblika ba finalidade refere.

Xefe Estadu informa tan katak Procuradoria-Jerál Repúblika (PGR) prepara ona relatóriu preliminár no kontinua halo investigasaun kona-ba alegasaun utilizasaun ladi’ak ba kredensiál Prezidensiál. Prezidente reafirma katak instituisaun hotu-hotu Estadu tenke hala’o sira-nia knaar tuir Lei no laiha ema ida boot liu Estadu Direitu.

Media PR