DÍLI, 12 Novembru 2026 (VIP TV) – Deputadu Bankada Parlamentár Partidu Demokratiku (PD), Mariano Fernandes Xavier Malik, afirma katak unidade no solidariedade polítika entre partidu sira iha Parlamentu Nasionál importante tebes atu asegura futuru Timor-Leste, liuliu iha prosesu diskusaun no aprovasaun Orsamentu Jerál Estadu (OJE) 2027.
Iha deklarasaunpolitika Bankada PD hato’o perspetiva polítika bankada nian kona-ba importánsia hametin unidade no konsensu entre lideransa polítika sira.
Nia konsidera katak atu atinji objetivu hametin reziliénsia nasionál, diversifikasaun ekonómika no dezenvolvimentu sustentável, partidu polítiku sira tenke iha kompromisu no responsabilidade hamutuk.
Mariano Fernandes Xavier Malik subliña katak líder polítiku sira ne’ebé reprezenta partidu lima iha Parlamentu Nasionál presiza halo esforsu konjuntu atu hametin unidade no solidariedade polítika.
Tuir nia, diferensa polítika la bele sai obstákulu ba esforsu hamutuk atu promove interese nasionál no garante dezenvolvimentu Timor-Leste nian.
Iha parte seluk, Bankada PD mós hato’o apresiasaun ba prestasaun servisu Governu nian, no konsidera katak esforsu sira ne’ebé hala’o ona tenke kontinua hametin liután atu responde ba nesesidade povu no promove dezenvolvimentu nasionál. PD subliña katak apoiu no kolaborasaun polítika importante atu garante implementasaun programa Governu nian, liuliu iha área sira ne’ebé iha impaktu direta ba moris sidadaun sira.
Proposta OJE 2027 iha montante total US$2.568.500.000, ka besik US$2,57 billaun, ho tema “Hametin Reziliénsia liuhosi Transformasaun: Diversifika Ekonomia ba Futuru Sustentável”.
Orsamentu ne’e sai instrumentu importante ba Governu atu implementa programa no polítika públika iha setór infraestrutura, edukasaun, saúde, agrikultura, turizmu no dezenvolvimentu ekonómiku.
Iha 11 Novembru 2026, Parlamentu Nasionál aprova proposta OJE 2027 iha faze jeneralidade ho votu afavór 41, kontra zero no abstensaun 23.
Prosesu diskusaun sei kontinua iha faze espesialidade, atu deputadu sira bele analiza ho kle’an liután alokasaun orsamentu ba ministériu no instituisaun públika sira.
Deklarasaun Bankada PD ne’e hametin mensajen katak unidade, solidariedade no responsabilidade polítika sai elementu importante atu harii futuru Timor-Leste ne’ebé forte, sustentável no inkluzivu.
