TL Apela Komunidade Internasional Hatuur Hikas Fali Orden Demokratiku iha Mianmar

DILI, www.news-viptv.com – Timor-Leste (TL) apela ba komunidade internasionál atu kontinua hakbiit esforsu tomak atu kontribui hodi hatuur hikas fali orden demokrátiku liuhusi diálogu ho parte hotu-hotu.

Apela TL nian ne´e hasia liu hosi komunikadu imprensa Prezidenti Republika, Jose Ramos-Horta ne´ebe Sexta (29/7/2022) lokoraik halo inkontru urjenti ho Primeiru Ministru Taur Matan Ruak, Prezidenti Parlamentu Nasional, Aniceto Guterres ho nia membru sira hosi Komisaun B PN.

Inkontru ne´e PR Ramos-Horta realiza hodi responde situasaun atual Mianmar nian ne´ebe foin lais ne´e junta militar Mianmar halo exekuasaun mate ba loyalist Aung San Suu Kyi nain 4 no hetan kondena makas hosi Nasoens Unidas no ASEAN.

Líder Timoroan sira konfere deklarasaun unánima ne’ebé hasai husi Prezidénsia ASEAN no rezolusaun unánima husi Konsellu Seguransa ONU (CS-ONU) kona-ba exekusaun trájika no arbitrária ba sidadaun sivil nain haat, membru husi pró-demokrátiku Mianmar.

“Líder Timoroan sira ne’ebé partisipa iha reuniaun ne’e elojia pozisaun husi dirijente ASEAN no husi CS-ONU nian no apoiu ho forma integrál deklarasaun rua ne’e,” hakerek komunikadu ne´e.

Mianmar iha instabilidade hafoin militar halo golpe kontra governu ne´e legal iha 1 fevereiru 2021 no kaptura sira nia prezidenti no konselleiru estadu Aung San Suu Kyi.