PM Xanana Husu ASEAN Respeitu ba Diretus Umanus no Liberdade Demokratika

DILI, www.news-viptv.com – Primeiru Ministru (PM) Xanana Gusmão iha nia mensajem relasiona ho loron aniversariu ASEAN bad ala 56, hato’o parabens no husu ba organizasaun rejional ne’e atu respeitu ba direitus umanus no Liberdade demokratika.

“Dala ida tan, permite ha’u hato’o parabéns ba ASEAN no dejeza susesu tomak iha konstrusaun ASEAN ida ne’ebé forte liután, ho respeitu ba Direitus Umanus no Liberdades Demokrátika,” dehan PM Xanana iha nia mensajem ne’ebe publika iha portal official governu.

Husi Timor-Leste, dehan PM Xanana iha mensajem ne’e, nia hato’o Timor-Leste nian parabéns ba ASEAN, tanba iha tinan 56 laran promove, estabilidade, unidade no pás iha rejiaun ne’e.

“ASEAN promove ona dezenvolvimentu no prosperidade ba benefísiu rejiaun ne’e nian no nia povu sira hotu. No abranje diversidade kulturál, istóriku no relijioza, ASEAN harii ona komunidade ida ne’ebé nakonu ho respeitu no toleránsia. Sudeste Aziátiku ohin-loron, sai hanesan poténsia ekonómika ho dinámika ida ne’ebé hateke ba futuru ho otimizmu tebetebes,” hateten PM Xanana.

Xefi Governu ne’e mos hateten, liu tiha tinan 24 luta ba independénsia no tinan 21 seluk hasoru luta foun, agora harii nia Estadu Demokrátiku no hanesan baze ba nasaun ida ne’ebé dezenvolvidu no sustentavel, Repúblika Demokrátika Timor-Leste kontinua buka hatene prinsípiu sira ne’ebé orienta ASEAN iha transformasaun Sudeste Aziátiku hanesan komunidade nasaun ida, ne’ebé iha konfiansa, amizade no kooperasaun sai hanesan valores ne’ebé halibur hamutuk nasaun oioin.

“Tanba ne’e maka Timor-Leste hanesan Membru Fundadór Organizasaun Intergovernamentál ida ne’ebé hanaran “g7+”, ne’ebé ho estatutu hanesan Observadór Permanente iha Organizasaun Nasoins Unidas (ONU), ne’ebé luta ba pás no ba dezenvolvimentu, maibé liuliu ba Konstrusaun Estadu Demokrátiku sira ne’ebé respeita Direitus Humanus no Demokrasia,” nia dehan.

Hodi hatutan, “Ne’e mak objetivu prinsipál, ne’ebé hamutuk ho Estadus Membrus19, Timor-Leste buka atu atinje no felizmente, ami prova ona ba mundu katak Timor-Leste iha ona dalan ne’ebé loos, hanesan bele haree liuhusi ami-nia partisipasaun pasifika no demokrátika iha ami-nia eleisaun Prezidensiál ho Parlamentar foin daudaun ne’e. Ha’u hatene katak, hamutuk ita bele hasoru dezafiu sira ne’ebé iha ita-nia oin, no aproveita oportunidade boot sira ne’ebé rejiaun ne’e oferese ba ita hotu”.

Antes ne’e, iha vizita particular ba Jakarta, Indonesia, Prezidenti Republika Joze Ramos-Horta mos hateten, katak Timor-Leste iha governasaun PM Xanana tau adezasaun Timor-Leste ba ASEAN nu’udar programa prioridade ba nia governasaun.

Iha nia hasoru malu ho Ministra Negosiu Estranjeiru Indonesia, Retno Marsudi, katak Timor-Leste preparaduliu hodi tama iha ASEAN iha tinan-2025 ho razaun Governu foun foin mak la’o.

‘’Se ita tama iha 2025, Governu atuál pelu-menus iha tempu atu priénxe kondisaun sira iha roadmap,’’ afirma Xefe Estadu.

Iha Setembru, xefi estadu konfirma ona ba Ministra Retno sei partisipa Simeira ASEAN no preparasaun Timor-Leste atu adere ba ASEAN.

‘’Ohin, ha’u enkontru ho Ministra Retno, ami ko’alia kona-bá Simeira ASEAN. Ha’u sei partisipa, tanbá kombina ona ho Primeiru Ministru Xanana. Mai nu’udár reprezentante Estadu Timor,’’ esplika PR Horta.

Timor-Leste dadauk ne’e sai ona membru ASEAN ho estatutu observador no iha ona deretu hodi partisipa inkontru tomak ASEAN nian.

Timor-Leste hatama karta aplikasaun hodi adere ba ASEAN desde Marsu 2011. Dadauk iha nasaun 10 maka iha ASEAN hanesan, Indonesia, Malaysia, Singapura, Filipina, Thailandia, Vietnam, Kamboja, Laos, Brunei Darrusalam, no Myanmar.