Rezigna hosi Embaixador, Blackstone Sei Husik Timor-Leste

VIPTV, DILI –  Embaixador Estadu Unidos Amerika (EUA) ba Timor-Leste, C. Kevin Blackstone sei husik Timor-Leste iha inisiu Agustus hafoin rezigna an hosi nia kargu.

Blackstone hato’o ona nia deklarasaun offisial liu hosi pajina Facebook Embaixada EUA ba Timor-Leste (U.S. Embassy, Dili, Timor-Leste) ne’ebe publika iha Segunda (2/8/2021).  

“Tanba sirkunstánsia pesoál urjente, ha’u sei rezigna an husi kargu Embaixadór no sei fila hikas ba Estadus Unidus iha inísiu fulan Agostu ne’e. Onra ida ba ha’u, iha ha’u-nia moris tomak mai servi hanesan Embaixadór EUA ba Timor-Leste no serbisu hamutuk ho funsionáriu dedikadu, profisionál husi Misaun EUA nian iha Timor-Leste,” komentariu Blackstone relasiona ho nia rezignasaun).

Nia komenta tan, “Laran di’ak Timoroan sira nian impresiona ha’u no ha’u sei rai metin memória barak ne’ebé ha’u hetan durante ha’u-nia tempu iha ne’e. Ha’u sempre nafatin orgullu profundamente ho servisu Misaun EUA nian hodi hametin parseria importante no rohan laek – no amizade – entre Estadus Unidus no Timor-Leste.”

Blackstone wainhira asumi kargu embaixador hato’o nia karta kredensial ba Prezidenti Republika Timor-Leste, Francisco Guterres Lu-olo iha 19 Marsu 2021.

C. Kevin Blackstone, membru kareira ida husi Servisu Superiór Negósiu Estranjeiru, Klase Ministru-Konselleiru, konfirmadu ona nu’udar Embaixadór Estadus Unidus Amérika ba Repúblika Demokrátika Timor-Leste iha loron 22 fulan Dezembru 2020.

Embaixadór Blackstone halao ona nia knaar hanesan Diretór Ezekutivu iha Gabinete Asuntus Ázia Leste no Pasífiku hahú husi fulan Jullu 2017 too Setembru 2020. Hanesan Ofisiál Servisu Estranjeiru dezde 1991, Embaixadór Blackstone antes ne’e halao knaar nu’udar Ministru-Konselleiru ba Jestaun Embaixada Estadus Unidus iha Kairo, Ejiptu, no Konselleiru Jestaun ba Estadus Unidus nia Embaixada sira iha Bangkok, Tailandia no Nova Delí, Índia.

Husi tinan 2009-2010, Embaixadór Blackstone sai hanesan Líder Ekipa ba Estadus Unidus nia Ekipa Rekonstrusaun Provinsiál iha Wasit Irake. Antes ne’e, nia serbi ona iha misoens konsulár no jestaun iha Nijéria, Uganda, Gabon, Itália, Kanada, Índia, no Ejiptu. Embaixadór Blackstone mós halao ona knaar nu’udar Ofisiál Programa iha Departamentu Estadu nia Gabinete Populasaun, Refujiadus no Migrasaun, inklui tinan ida diriji Gabinete nia Sentru Prosesamentu iha Washington hodi simu refujiadu sira husi antiga Uniaun Soviétika.

Nia koalia Portugese, francês, Italianu no aprende daudaun Tetum. Embaixadór Blackstone hasai Lisensiatura iha Universidade Virjinia no Mestradu Administrasaun Públika husi Eskola Maxwell, Universidade Syracuse. Nia no ninia espoza Alexandra nu’udar inanaman ba oan adultu nain rua.