TL-Thailandia Troka Idea Livre Visa Entre Nasaun Rua

PHNOM PENH, www.news-viptv.com – Timor-Leste maski sedauk sai membro estadu ASEAN, kontinua aproxima nasaun sira iha rejiaun refere hodi halo relasaun bilateral, inklui Thailandia ne´e troka ona idea hodi implementa livre visa entre nasaun rua.

Ministra Negosiu Estranjeiru no Kooperasaun, Adaljiza Magno iha nia inkontru ho Vise Primeiru Ministru no Ministra Negosiu Estranjeiru Thailandia, Don Pramudwinai koalia mos kona ba possibilidade Thailandia sei suporta treinamentu ba diplomata junior Timor-Leste.

“Ministra Magno mos hato´o obrigado ba Thailandia nia aoia ba prosesu Timor-Leste nian adezaun ba ASEAN, especialmente iha iniciativa ba misaun exploratória ASEAN ba Pilar Politika no Seguransa ne´ebe realiza ona iha tinan 2019 iha Thailandia nia lideransa,” hakerek komunikadu imprensa ne´ebe redasaun simu.

Alende ne´e, nasaun rua ne´e mos koalia kona ba inkontru konsultasaun politika dahat entre nasaun rua, inklui Timor-Leste mos husu apoia Thailandia nia ba kandidatura Timor-Leste ba Konsellu Diretus Humanus.

Ministra Magno ho nia delegasaun dadauk ne´e iha hela Phnom Penh, Kambodia hodi partisipa Forum Rejional ASEAN (ARF) ba dala 29 nian.