Habelar Asaun Konjunta Hasoru COVID-19, EUA Apoia Tan US$ 500.000 ba UNICEF

DILI, www.news-viptv.com – Estadus Unidus Amerika liu husi Ajensia Estadus Unidus ba Dezenvolvimentu Internasional (USAID) anunsia doasaun US$ 500.000 ba Fundus Nasoens Unidas ba Labarik (UNICEF) hodi habelar asaun konjunta ba apoiu atu hatan ba COVID-19 nasional iha Timor-Leste, inklui distribuisaun vasina sira.

Apoia fundus ne’e, Enkaregadu Negosius Estadu Unidus Tom Daley anunsia hamutuk ona ho Reprezentante País UNICEF Timor-Leste Bilal Durrani.

Iha komunikadu imprensa ne’ebe redasaun simu hosi Embaixada EUA ne’e esplika, US$ 500.000 adisional bazeia ba apoiu mak iha ona husi Estadus Unidus nia apoiu ba UNICEF hodi habelar intervensaun sira hatan ba COVID-19, ajuda ba implementasaun kampaña vasinasaun hasoru COVID-19 no kontinuasaun servisu esensial sira saude maternal, neonatal no infantil.

Fundus ne’e sei mellora asesu ba fisilidade bee moos, saneamentu, no ijiene (BESI sigla Tetun) iha Sentru Saude Komunitaria 14 sira (CHC sigla Inglés); advokasia no konsiensializasaun simu vasina no prevensaun COVID-19; no akizisaun suprimentu médiku esensial sira hodi ajuda kontinuasaun servisu saude krítiku sira. Maizumenus populasaun 500.000 mak sei benefisia husi intervensaun sira ne’e.

“Hahú inisiu husi pandemia, Estadus Unidus servisu hamutuk ho Governu Timor-Leste hodi fornese vasina Pfizer doze 200.000 liu no asistensia krítiku atu kombate COVID-19 dolar millaun $6.4 liu,” dehan Tom Daley.

Nia dehan tan, “Ami orgullu ba parseria ho Ministeriu Saude ho UNICEF hodi apoia Timor-Leste hatan ba COVID-19 no reforsa seguransa saude atu prevene pandemia sira iha futuru. Timor-Leste bele kontinua konta ho Estadus Unidus wainhira ita servisu hamutuk hodi hakutu pandemia no halais rekuperasaun ekonomia.”

To’o iha momentu ne’e ema rihun atus balun iha munisipiu lima benefisia ona husi atividade sira hatan ba COVID-19 liu husi parseria entre USAID, UNICEF, no Ministeriu Saúde. Ne’e realiza ona liu husi melloria fasilidade BESI iha Sentru Saude Komunitaria 20 iha munisipiu lima; konsientizasaun kona-ba prevensaun COVID-19 no adosaun vasina liu husi enkontru advokasia sira, implementasaun kordenasaun mobilizasaun pesoal no mobilizasaun husi uma ba uma iha munisipiu haat; no provizaun instrumentu fase liman no soprimentu ijiene sira iha sentru saude 15.

Nune’e mós, UNICEF inisia ona progresu melloramentu BESI iha Sentru Saude adisional 14 no inisia ona akizisaun konsentrador Oxijeneu médiku sira, ekipamentu protesaun pesoal, no soprimentu medikal sira seluk ba Sentru Saude Komunitaria sira.

“Ita agradese ba apoiu finansiamentu hodi hatan ba COVID-19 nasional, tanba sei ajuda liu labarik no familia sira hetan apoiu krítiku sira nesesita, inklui asesu ba fasilidade bee moos, saneamentu no ijiene iha sentru saude sira, hetan ona vasina hasoru CODID-19 no simu tratamentu wainhira sira moras,” dehan Ministra Saude, Dra. Odete Maria Freitas Belo.

Ministra hateten, apoiu konjunta husi USAID no UNICEF sei mós ajuda proteje profesional saude sira iha medida prestasaun servisu saude sira-nian.

UNICEF apoia hela ona Timor-Leste nia hatan ba COVID-19 nasional hahú inisiu 2020, no kontribui ona ba melloria asesu ba servisu saude sira, inklui servisu esensial ba nutrisaun, imunizasaun rutina no kuidadu saude ba inan no oan sira, melloria asesu ba aprendizajen distansia no eskola seguru sira, ajuda instala sistema sira no habelar intervensaun protesaun labarik no protesaun sosial sira.

Reprezentante Pais UNICEF, Bilal Durrani hateten, Parseria entre USAID, UNICEF, no Ministeriu Saude rezulta ona ba ema nia asesu ba bee moos iha sentru saude barak, informasaun kona-ba prevensaun COVID-19 no vasina sira no iha tempu badak sentru saude sira hetan soprimentu adisional hanesan EPPs.

“Finansiamentu  ne’e sei ajuda habelar benefisiu intervensaun krítiku sira ba ema rihun-atus iha Timor-Leste tanba ita servisu hamutuk hodi prevene surtu COVID-19 no moras sira seluk, no ajuda formula rekuperasaun pos-COVID-19 sentrada ba labarik sira,” nia dehan.