Valoriza Papel Feto iha Igreja, DCC Realiza Semanal Feto

DILI, www.news-viptv.com – Hodi rekonese papel feto sira iha ministeriu igreja nian, Dili City Church realiza selebrasaun semanal fetoho tema jeral libertada feto hodi transforma sosiedade liu husi evanjellu no poder Esperito Santo.

Selebrasaun semanal feto ne’e remata iha Dominggu (10/5/2026) ho kultu selebrasaun, hafoin loke desde Kuarta (6/5/2026).

Diakona Agida dos Santos nu’udar lider feto Dili City Church hateten nu’udar feto, feto sira iha igreja mos iha papel importante hodi oinsa ajuda ministeriu igreja nian liu husi servisu evanjelizasaun no atividade sosial.

“Tamba ita hatene katak, igreja ida ne’e, harii hahu husi ami feto sira. Ami feto sira mak metin, forsa halo pelayanan, to’o agora igreja ida-ne’e bele hamriik, hanesan ita hotu hare feto mak barak, signifika katak, feto nia papel importante laos iha uma deit, maibé importante mos iha igreja no feto sira mos bele halo maromak nia servisu,” dehan Diakona Agida dos Santos ba VIP TV.

Atividade ne’ebe Dili City Church halo durante semanal feto nian ne’e maka fahe Maromak nia Lia Fuan, orasaun hamutuk no halo kariedade.

“Selebrasaun kona ba feto nian ne’e, ami senti kontenti tebes, tamba durante ne’e, ami seidauk selebra  ida-ne’e; tamba igreja mos foun.tamba ida-ne’e primeira ves, ami selebra women’s day, durante semana tomak ida-ne’e, ami halo orasaun hamutuk, ami rona maromak nia liafuan hamutuk, alende ida-ne’e, ami mos halo atividade ki’ik  sira, hanesan ami fahe hahan, no buat presiza loro loron nian,” nia dehan.

Nu’udar lider feto igreja, nia espera feto sira iha igreja ida-ne’e, tantu klosan, tantu ferik, bele konese Maromak klean liu tan, no sira bele enkontru rasik ho Maromak atu bele sai feto ne’ebe forti, moris bazeia ba Maromak nia liafuan santu.

Bendita Miranda nu’udar membru senti abensua ho selebrasaun ne’e tamba hasa’e tan sira nia kresimentu espritual no haforte feto iha vida espritual hodi aplika iha vida moris lor-loron hamutuk familia sira.

“Ha’u nu’udar inan, nu’udar fen Ha’u agradese tebes ba maromak, problema haksoru iha sosiedade no  iha hau nia uma laran rasik mos, ha’u nafatin hamriik  metin, katak ba ema umanu labele, mais ba maromak hau fiar katak bele,” hateten Bendita.

Nune’e mos Elia Marques nu’udar Membru no feto foin’sae iha igreja ne’e enkoraja ba feto foin-sa’e sira atu hakbesik an ba Maromak no ba igreja hodi aprende no rona Maromak nia Lia Fuan, tamba liu husi Maromak nia Lia Fuan maka bele transforma ema nia moris.

“Ha’u nia esperansa katak, tuir mai ha’u nia maluk feto sira, kristaun sira malu sira seluk, labele tauk, labele laran susar, atu aprende maromak nia liafuan, liu husi maromak nia liafuan, sei halo transformasaun ba ita nia moris, liu husi maromak nia liafuan ita sei aten brani , hodi hasoru situasaun saida de’it,” nia hateten.

Dili City Church nu’udar igreja Kristaun Church of Pentecost mundial ne’ebe nia vizaun no misaun oinsa maka transforma ema liu husi Evanjellu Kristu no moris tuir dutrina Nain Jesus nian iha Mateus 28:18-20, kona ba grande misaun husi Jesus nia mandamentu ikus ba Nia eskolante sira molok Nia sa’e ba lalehan. Versíkulu ne’e afirma Jezús nia autoridade suprema iha lalehan no iha rai, mandamentu atu halo dixípulu sira husi nasaun hotu-hotu liuhusi evanjelizasaun no batizmu, no promesa kona-ba Ninia prezensa rohan-laek.