Vizita Cailaco, PR Horta Enfatiza Revitalizasaun Sektór Agrikultura

CAILACO, www.news-viptv.com – Hare’e ba setor agrikultura importante ba Timor-Leste, Xefi estadu iha nia vizita ba Kailako, enfatiza katak, revitalizasaun sektór agríkola ne’e vitál tebes ba hadi’a moris iha área rurál no fó apoiu ba família serbisu-na’in sira iha rejiaun ne’e.

Ba estudante no komunidade sira iha Eskola Sekundaria Teknika Vokasional Dom Bosco Maumali, Calico, Munisipiu Bobonaro, Prezidente Repúblika J. Ramos-Horta reafirma hikas ninia kompromisu ba dezenvolvimentu lokál hodi promete osan hamutuk US$ 100.000 ba hadi’a mákina agríkola sira ne’ebé esensiál.

Liu hosi kordenasaun ho Primeiru-Ministru no IX Governu, inisiativa ne’e viza atu restaura fali trator sira ba komunidade, hodi hamenus kusta operasionál ba agrikultór lokál sira husi $20 ba de’it $5 kada oras.

Iha assuntu edukasaun, Xefe Estadu anunsia oportunidade internasionál oioin, inklui bolsa estudu 30 ba Holanda no programa espesializadu iha Universidade Taylor iha Malázia.

Prezidente mós husu foin-sa’e Maliana sira atu foka liu ba área Siénsia, Teknolojia, Enjeñaria no Matemátika (STEM), inklui mós lian sira hanesan Inglés no Mandarim.

Prezidente subliña katak maske siénsia sosiál sira iha valór, dezenvolvimentu nasaun nian iha futuru depende ba espesialidade téknika iha área hanesan Medisina, Dijitalizasaun, no Inteligénsia Artifisiál (AI) hodi harii Estadu ida ne’ebé modernu no kompetitivu.

Refleta mós kona-ba progresu Timor-Leste nian dezde independénsia, Prezidente Ramos-Horta nota kresimentu signifikativu iha sektór saúde, ne’ebé aumenta husi médiku na’in 21 de’it iha 2002 ba médiku na’in 1.400 resin ohin loron. Xefe Estadu mós bolu atensaun ba esforsu nasionál atu fó kompensasaun no valór di’ak liután ba mestre sira, tanba sira-nia papel fundamentál ba kualidade moris nasionál.

Vizita ne’e remata ho foku ba sustentalibilidade, iha ne’ebé Prezidente esplika detallu kona-ba projetu infraestrutura verde foun iha Dili ne’ebé sei fornese uma-hela modernu ba estudante feto sira husi área rurál ne’ebé foka ba área STEM, hodi garante katak jerasaun lider Timoroan tuirmai prontu ona ba dezafiu sira aban nian.