Lafaek Haforsa Lian No Inkluzaun Iha Bobonaro

BALIBO, www.news-viptv.com  – CARE Timor-Leste sente orgullu hodi sai uma-na’in ba eventu espesiál ida iha Balibo, Munisípiu Bobonaro, hodi selebra impaktu transformativu husi Projetu Lafaek, Sexta (17/10/2025) iha Balibo.

Iha eventu ne’e, Embaixadór Nova Zelándia iha Timor-Leste, no Prezidente Autoridade Munisípiu Bobonaro, sei hamutuk ho CARE no autoridade lokál sira hodi distribui edisaun foun Revista Lafaek nian ba estudante, manorin na’in, no família sira.

Eventu ne’e sei hala’o iha Eskola EBF.1.2 Weclese, Postu Administrativu Balibo, no sei foka liu ba parseria ne’ebé sei kontinua entre CARE Timor-Leste, Governu Nova Zelándia, no Ministériu Edukasaun Timor-Leste.

Hahú husi tinan 2001, Projetu Lafaek servisu ona atu hadi’a kualidade edukasaun, hametin lideransa, no promove governasaun inkluzivu no moris-di’ak família nian. Ho apoiu husi Governu Nova Zelándia,

projetu ne’e distribui Revista Lafaek ba estudante liu 245,000 iha pre-eskolár no klase 1-6, manorin na’in 10,000 liu, no uma-kain 148,000 iha teritóriu laran tomak.

“Governu Nova Zelándia orgullu atu hamriik hamutuk ho Timor-Leste hodi suporta iha área edukasaun, Bainhira ita servisu hamutuk nu’udar ekipa ida, husi manorin na’in no estudante sira to’o ita-nia parseiru lokál sira, ita bele halo diferensa loloos, ajuda labarik sira aprende, mehi, no sai líder Timor-Leste nian iha futuru,” Hatete Embaixadora Nova Zelándia iha Timor-Leste Helen Jane Tunnah.

Ko’alia iha eventu ne’e, Diretór Nasionál CARE iha Timor-Leste, Peter Goodfellow foka liu ba projetu nia alkansa no kompromisu ba justisa sosiál: “Lafaek la’ós de’it revista ida; maibé mosinstrumentu ida ne’ebé forte ba ekuidade no inkluzaun. Bainhira too iha estudante, manorin na’in no uma-kain rihun atus ba atus, liuliu iha munisípiu rurál sira hanesan Bobonaro, ami ajuda ultrapasa bareira ba edukasaun no amplifika lian sira ne’ebé dala barak ignora hela iha kotuk.”

Eventu ida ne’e inklui, entrega simbóliku Revista Lafaek Edisaun 3/2025, no demonstrasaun kona-ba oinsá revista ne’e uza iha sala (aula) laran husi Grupu Impaktu Lafaek. Ida-ne’e reafirma CARE nia kontinuasaun kompromisu atu hadi’a rezultadu edukasaun no asegura katak labarik hotu iha Timor-Leste iha asesu ba matéria aprendizajen ho kualidade, la importa sira hela iha ne’ebé.

CARE hanesan organizasaun internasional ba dezenvolvimentu no umanitariu ne’ebé servisu iha Timor-Leste dezde 1994. Ho programa sira ne’ebé konsentra iha munisipiu hotu iha rai-laran, CARE servisu hamutuk ho parseiru sira atu salva moris, halakon ki’ak, no atinje justisa sosial.

CARE servisu ho komunidade sira iha area rural no hamutuk ho parseiru sosiedade sivil sira atu luta hasoru dezigualdade jéneru, tamba ida ne’e hatudu ona katak dalan efetivu ida atu kria impaktu ba dezenvolvimentu ne’ebé sustentavel.

Asegura moris di’ak no rona feto no labarik feto sira-nia lian iha area ne’ebé rural no dezvantajen sai nudar sentru ba CARE nia servisu. Ida ne’e atinje liu husi area prioridade haat hanesan Edukasaun, Hakbiit Feto sira-nia Ekonómia, Saúde no promove Feto sira-nia Lian iha sosiedade liu husi programa dezenvolvimentu no umanitariu sira.

Dezde 2001, projetu Lafaek sai hanesan intervensaun importante ida ba CARE no ami nia parseiru xave sira.

Projetu ne’e nia intervensaun too populasaun Timor-Leste ho númeru boot, liu-liu komunidade rural sira, no projetu ne’e efetivamente promove literasia, numerasia, no dezenvovimentu, inklui mos promove igualdade jéneru no ekuidade. Projetu Lafaek fornese responde di’ak ba Timor-Leste nia kontestu dezenvolvimentu, Liu-hosi projetu Lafaek, CARE agora dadaun publika revista Lafaek sira hanesan lista iha kraik, dala tolu iha tinan ida nia laran ho parseria hamutuk ho Governu Timor-Leste nia Ministériu Edukasaun no Governu Nova Zelandia nia programa asistensia.

1. Lafaek Ki’ik (pajina 20) – ba kanorin sira iha pre-eskolár no kanorin sira iha klase 1-2
2. Lafaek Prima (pajina 24) – ba estudante sira iha klase 3-6
3. Lafaek ba Manorin (pajina 16) –ba maroin pre-eskolár no eskola primaria sira
4. Lafaek ba Komunidade (pajina 24) – ba membru komunidade sira

Adisionalmente, CARE dezenvolve ona plataforma online sira ba projetu Lafaek, hanesan Facebook no website atu hadi’ak governasaun inkluzivu, partisipasaun foinsa’e sira nian, no mos hakbiit foinsa’e sira no edukasaun.

Fontes: Media GPM