Japan: Adezaun Timor-Leste ba ASEAN no WTO Importante

PHNOM PENH, www.news-viptv.com – Japaun nu´udar nasaun iha Asia Oriente ne´ebe kaer mos xavi ekonomia mundu global nian, ekonomikamente hare adezaun Timor-Leste ba ASEAN no World Trade Organization (WTO) importante.

Statementu Japan nian ne´e hato´o hosi nia Ministru Negosiu Estranjeiru Yoshimasa Hayashi wainhira inkontru ho Ministra Negosiu Estranjeiru no Kooperasaun Timor-Leste, Adaljiza Magno iha âmbito Forum Rejional ASEAN ne´ebe realiza iha Phonm Penh, Kambodia.

“Relasiona ho isu multilateral, nasaun rua konkorda importância adezaun Timor-Leste ba ASEAN no WTO. Japan komitmentu hodi suporta Timor-leste iha esforsu integrasaun nia ekonomia,” hakerek komunikadu imprensa ne´ebe redasaun simu hosi Ministeriu Negosiu Estranjeiru no Kooperasaun.

Iha inkontru ne´e, Ministra Magno apresia programa kooperasaun nasaun rua iha área defesa, ekonomia, infraestrutura, edukasaun, saúde, agrikultra no seluk tan.

Ministra Magno mos la haluha hato´o nia sentidu kondolensia ba eis Primeiru Ministru Shinzo Abe nia mate. Shinzo Abe, esplika Ministra Magno ih akomunikadu ne´e iha kontribuisaun makas ba dezemvolvimentu Timor-Leste wainhira lidera governu Japaun.

Japan ho Timor-Leste halo ona relasaun bilateral durante tinan 20, desde Timor-Leste hetan nia restaurasaun independensia iha 20 Maiu 2002 no hetan nia rekonesementu independensia hosi Organizasaun Nasoen Unidas.