INCSIDA, I.P Halo Sensibilizasaun Prevensaun Moras HIV/SIDA ba Estudante Saude Publika UNPAZ

Díli, www.news-viptv.com – Relasiona ho numeru ema ho moras HIV/SIDA ne’ebe iha ona 2,400 no hamete ona ema 411,  Institutu Nasional de Combate ao HIV-SIDA, Institutu Públiku (sigla-INCSIDA, I.P) realiza seminariu ho tema Kombate Infesaun Virus HIV/SIDA iha Timor-Leste ba estudante Saude Publika Universidade da paz (UNPAZ).

Tuir Presidente INCSIDA, I.P, Daniel Marçal hatete, seminariu refere hodi aumenta edukasaun no sensibilizasaun liu-liu ba joven sira atu prevene transmisaun virus HIV/SIDA iha futuru.

Nia esplika, estudante sira, liu-liu sira iha área saúde, atu akompaña programa ne’e ho seriedade, tanba iha futuru sira sei sai profisionál saúde ne’ebé sei atende komunidade.

“Dadus atual iha pesoal saúde balun ne’ebé hetan infesaun HIV tanba falta prevensaun. Tanba ne’e, importante tebes atu tau atensaun ba medida prevensaun sira,” dehan Daniel Marcal ba jornalista sira, Tersa (14/4/2026), iha Salaun Jose Casmiro UNPAZ, Dili.

Nia informa, iha Timor-Leste, maioria kazu HIV/SIDA da’et liu husi relasaun seksuál ne’ebé la segura, ho nune’e presiza kontrolu no konsiensia atu evita konsekuénsia ne’ebé bele afeta moris tomak.

Vice-Reitora ba Asuntu Estudantil, Felisbela de Oliveira, Lic.SP., M.SP ne’ebé reprezenta Magnífiku Reitor UNPAZ hatete, seminariu ne’e importante tebes ba estudante sira, inklui estudante bele sai ajente mudansa hodi bele fahe mos informasaun ba komunidade sira.

“Estudante sira mós bele sai agente mudansa, hodi fahe informasaun ba komunidade ne’ebé seidauk asesu ba edukasaun saúde. Atividade hanesan ne’e la para iha momentu ida ne’e de’it, maibé bele kontinua iha futuru no envolve estudante sira husi fakuldade hotu-hotu,” nia dehan.

Orasia Britis nudar estudante hatete, nia pronto atu espalla informasaun ne’e ba komunidade ne’ebé seidauk iha asesu ba edukasaun saúde.

“Ami haree katak nasaun ne’e mós hasoru kazu barak, ne’e halo ami orgullu atu aprende no fahe informasaun ba komunidade atu hamenus propagasaun,” hateten estudante.