Agrikultura, Peskas no Setor Privadu sai ajenda ikus Diskusaun AEC

DILI, www.news-viptv.com – Hafoin durante loron rua halo inkontru ho ministru balun ne´ebe liga ba área ekonomia nian, Misaun Esploratoriu Komunidade ASEAN ba Pilar Ekonomia (AEC) taka sira nia diskusaun loron ikus ho topiku agricultura, peskas no involvimentu setor privadu ba ekonomia Timor-Leste nian.

Iha nia apresentasaun, Ministeriu Agrikultura no Peskas foti topiku diskusaun kona ba politika setor agrikultura no peskas ho nia konstribuisaun ba ekonomia Timor-Leste nian iha futuru.

Durante apresentasaun, ba apresentasaun dahuluk, ministério ne´e informa kona ba politika, iniasiativa no prioridade atuais sira iha setor agrikultura nian ne´ebe fokus ba garantia segurança alimentar, segurança alimentar no nutrisaun, medida sira hodi aumenta produtividade no kualidade produtor agrícolas. No Politika ministério nian hodi promove agricultura organika iha TL

Iha área peskas, esplika kona ba politika, inisiativa setor peskas ne´ebe konsentra ba desenvolvimento aquicultura, aplikasaun antibiótica iha produsaun peskas no atividade relasiona ho combate atividade ilegal no não declaradas e não regulamentadas.

“Esensia ne’ebe ohin apresenta hosi ministeriu agrikultura no peskas atu responde deit ba politika no estratejia ne´ebe mak ministru agrikultura iha atu responde no prense kriteria hodi sai hanesan membru ASEAN nian ne´ebe mak relasionadu ba agrikultura, peskas, florestas no pekuaria.  Politika saida deit mak ministeriu halo baseia liu ba Lei, Dekretu Lei, Regulamentu ho resolusoens Governu buat nebe mak governo prepara balu aprova ona no balu seidauk aprova maibe saida mak ita emplementa tuir duni lei. Dekretu lei no regulamentus ne´ebe mak ita iha tamba ne´e sai mos kriteria ida ba ita atu sai hanesan mos membru ASEAN ita tenki prense kriteria ne´ebe mak tuir sira nia hakarak hanesan hare liu ba Lei Dekretu lei no regulamentos sira hotu,” esplika Diretora Jeral Agrikultura MAP, Maria Odete do Ceo ba jornalista sira, Kinta (21/7/2022), iha Timor Plaza, Dili.

Diretora Jeral ne´e mos esplika tan, iha nia apresentasaun delegasaun sira mos husu kona ba oinsa Timor-Leste nia kontrola ba atividade peskas ilegal.

“Iha mos preokupasoes husi sira mak sobre atividades peskas ilegais. Sobre peskas ilegais ita la servicu mesak, maibe ita servisu ho nasaun Australia no nasaun sira seluk. Entermos kontrolu iha atividades peskas ilegais iha rai laran, ita mos servisu hamutuk ho lina ministeriais hanesan Polisia, PSIK tantu husi marinhas nian no halo kolaborasaun husi autoridade lokal sira atu bele halo kontrola ba actividades peskas ilegais nian,” nia dehan.

Iha diskusaun neé, delegasaun sira mos preokupa liu ba importasaun no exportasaun, liliu iha lei sanitariu nian, lei ba protesaun animal no protesaun planta.

Remata apresnetasaun hosi MAP, diskusaun kontinua ho Camara Comercio Industria de Timor-Leste (CCI-TL) neébe diskusaun ne´e ho topiku oinsa komprende ba papel setor privadu iha economia TL no involvimentu ho ajensia governu iha Timor-Leste.

“Em principio ita koalia liu kona ba kondisaun embrial iha sektor privadu nian katak ita iha situasaun ida ne´ebe mak iha progresu buka atu envolve ita nia aan no buka atu hadia e kapasita ita nia aan no buka oportunidade ba investimentu no parseira ho nasaun sira membru ASEAN la hein to bainhira mak ita oficialmente adere ba membru ASEAN nebe hahu agora ita mos tenki halo parseiro ho membru ASEAN sira seluk,” dehan Vise Prezidenti CCI-TL, Herguilina Fernandes Alves, iha Novo Turismu, Dili.

Nia dehan tan, “CCI-TL hanesan parseirio governu nian tenta atu halo advogasia makas e tenta atu kapasita ba fatin sektor privadu sira bele sai hanesan sektor privadu ida nebe mak real, dinamika, no produtivo e valores sira nee ami tenta atu halo para iha prosessu hotu hotu iha setor privadu sira hosi mikro, mediu no to´o ita nia empresariu bo´ot sira para bele sustenta ekonomia rai laran.”