DILI FALINTIL-Forsa Defeza Timor-Leste (F-FDTL) no Forsa Armada Portugal kontinua hametin kooperasaun bilaterál iha área saúde militár, liuhusi preparasaun programa formasaun no avaliasaun téknika atu hadi’a kapasidade profisionál pesoál saúde militár Timor-Leste nian.
Kooperasaun ne’e sai hanesan objetivu prinsipál iha vizita ofisiál ekipa saúde Forsa Armada Portugal ba Kuartél Jenerál F-FDTL, iha Fatuhada, iha segunda-feira, 19 Outubru 2026.
Ekipa saúde Portugal ne’e lidera husi Koronel Farm. Fernanda Pires, Subdiretora UEFISM, no akompaña husi Tenente-Koronel Enf. Pereira. Ekipa ne’e hetan simu husi Supervizór Diresaun Saúde Militár (DSM) F-FDTL, Koronel Guido de Oliveira.
Durante vizita, delegasaun rua halo diskusaun kona-ba preparasaun vizita téknika atu avalia kapasidade instalasaun saúde militár, identifika nesesidade formasaun ba pesoál saúde no koordena ho komponente no unidade sira F-FDTL atu determina fatin apropriadu ba implementasaun programa formasaun.
Iha Publikasaun ne’ebe publika husi Ralasaun publikas F-FDTL nian iha pajina official sitaPrograma formasaun ne’e planeadu atu hala’o husi 19 Novembru to’o 3 Dezembru 2026, ho apoiu husi ekipa profisionál saúde Forsa Armada Portugal, ne’ebé lidera husi Koronel Farm. Fernanda Pires no Tenente-Koronel Enf. Pereira, hamutuk ho ekipa.
Liuhusi programa ida-ne’e, espera katak pesoál saúde militár F-FDTL bele hasa’e koñesimentu, abilidade no kapasidade profisionál, liuhusi partilla esperiénsia no prátika di’ak iha área saúde militár.
Kooperasaun ida-ne’e mós importante atu identifika nesesidade institusionál no dezenvolve kapasidade rekursu umanu, nune’e bele suporta hadi’ak servisu saúde ba membru F-FDTL.
Iha rohan vizita, parte rua halo aprezentasaun no diskusaun kona-ba Diresaun Saúde Militár, antes troka prezente hanesan símbolu amizade, respeitu mútu no kompromisu atu kontinua hametin relasaun kooperasaun bilaterál entre Timor-Leste no Portugal.
Kooperasaun iha área saúde militár ne’e hatudu katak relasaun entre F-FDTL no Forsa Armada Portugal kontinua dezenvolve, liuliu iha esforsu atu hametin kapasidade profisionál no hadi’ak preparasaun pesoál saúde militár.
