Timor-Leste sei Halo Kooperasaun ho Singapura ba Formasaun Profesór

DILI, www.news-viptv.com – Hodi kapasita profesór Timoroan sira, Governu Timor-Leste liu husi Ministeriu Edukasaun sei halo kooperasaun ho Singapura.

Kooperasaun ho Singapura ne’e, Ministeriu Edukasaun simu ona poder tomak liu husi dezisaun konsellu ministru iha sorumutu Konsellu Ministru, tersa (4/11/2025), ne’ebe atribui podér tomak ba Ministra Edukasaun, Dulce de Jesus Soares, atu asina Memorandu Entendimentu ida ho Governu Singapura, ba kooperasaun iha ámbitu edukasaun, liuliu iha formasaun ba profesór sira.

Alende ne’e, Konsellu Ministrus mos aprova projetu Proposta Rezolusaun Parlamentu Nasionál, ne’ebé aprezenta husi Ministru Negósius Estranjeirus no Kooperasaun, Bendito dos Santos Freitas, ba ratifikasaun Deklarasaun Admisaun Repúblika Demokrátika Timor-Leste ba Asosiasaun Nasoins Sudeste Aziátiku (ASEAN).

Proposta Rezolusaun ida-ne’e ho intensaun atu ratifika Deklarasaun kona-ba Admisaun Repúblika Demokrátika Timor-Leste ba ASEAN, ne’ebé asina iha Malázia, iha loron 26 fulan-outubru tinan 2025, durante serimónia adezaun plena Timor-Leste nian ba organizasaun rejionál ne’e.

Deklarasaun ne’e reprezenta aseitasaun polítika husi Estadus-Membrus ASEAN kona-ba inkluzaun Timor-Leste nian nu’udar Estadu-Membru plenu direitu, tuir n. 4 artigu 6.º husi Karta ASEAN, ne’ebé nu’udar etapa esensiál ida ba integrasaun plena Timor-Leste nian iha mekanizmu no estrutura sira organizasaun nian.