Hapara Transporte Diresaun Laclubar-Dili, UEL Konsidera Dezisaun DNTT Injustisa

DILI, www.news-viptv.com –  Uniaun Estudante Laclubar (UEL) iha Kapital Dili konsidera dezisaun Diresaun Nasional Transporte Terreste (DNTT) Munisipiu Manatuto hodi hapara movimentu transporte publiku husi Laclubar ba Dili nudar dezisaun injustisa.

Porta-Voz UEL, Jeronimo Soares hateten, dezisaun DNTT ne’e kontra Konstituisaun RDTL ne’ebe viola prinsipiu jeral sira kona-ba Universalidade no igualidade tuir artigu 16.

“Ami konsidera mos katak ida ne’e violasaun direitu povu nian. Komunidade Laclubar terus ba direitu baziku atu hetan transporte, no asessu ba saude, edukasaun no merkadoria,” dehan porta-voz UEL ne’e ba jornalista sira iha konferensia imprensa, Sexta (8/5/2026), iha Jardim 5 de Maio, Colmera, Dili.

Dezisaun hapara movimentu transporte ne’e, hatudu autoridade sira falta kapasidade no vontade atu resolve problema ida ne’e, ne’ebe nia impaktu bele hamosu krize sosial iha Laclubar, inklui juventude sira ne’ebe nu’udar futuru lideransa ne’ebe luta hela iha edukasaun sai mos vitima tamba labele assesu ona transporte publiku iha sira iha Laclubar.

Tamba ne’e, UEL ejiji ba autoridade kompente atu ativa hikas movimentu transporte publiku refere, tamba senti diskrimina ho dezisaun autoridade enkuantu komunidade iha Natarbora, Soibada ho Laclo iha movimentu transporte publiku dereta ba sira nian fatin.

“(Dezisaun) ami konsidera la iha kredibilidade, tamba implementasaun la aplika ba hot-hotu, ida ne’e manipulasaun ba lei,” hateten porta voz ne’e.

UEL deklara, karik ejijensia sira nia hetan resposta, sira sei halo asaun hasoru DNTT Munisipiu Manatuto, tamba ejijensia ne’e mai husi komunidade Laclubar.

“Husu ba Diretor DNTT Munisipiu, sei la rezolve ami nia problema ida-ne’e, ami prontu mobiliza malu atu halo blokea, bus diresaun husi Natarbora mai Dili, tamba desizaun ne’ebe diretor sita, ami konsiente katak ne’e nia kontra Konstituisaun, no ida ne’e nia kontra povu husi Postu Laklubar,” hateten, Luzinho Herkulandu Ferreira, membru UEL.

DNTT Munisipiu Manatuto desde fulan 3 liu ba hapara ona movimentu transporte publiku Laclubar – Dili, maibe kontinua autoriza transporte publiku diresaun seluk hanesan Natabora, Soibada, no Laclo.