Samsung Hakarak Implementa Programa CSR iha Timor-Leste

DILI, www.news-viptv.com – Kompana eletroniku Samsung hosi Koreia Sul planu no hakarak implementa sira nia programa Corporate Social Responsibilities  (CSR) iha Timor-Leste.

Presidenti Samsung Eletroniku, Rhee In Yong esplika, CSR hanesan projetu ida ne’ebe Samsung implementa ona iha nasaun barak ho nia objetivu kompana (Samsung) hakarak fo fila fali ba komunidade sira kona ba saida maka persiza no nesesita liliu ba foin sa’e sira.

“Ami promote ba sua excelensia presidente atu kontribui liuliu iha area responsabilidade social hanesan kompania atu fo fila ba komunidade sira saida maka presiza, saida maka nesesita iha ne’e para ami bele desenvolve joven sira ne’e ,” dehan Rhee In Yong ba josrnalista sira, hafoin hasoru malu ho Prezidenti Republika, Jose Ramos-Horta, Sexta (19/8/2022), iha Palasiu Presidensial Dili.

Iha CSR nia projetu, Samsung iha programa ida hanaran Solve for Tomorrow ne’ebe foka liu ba desenvolve no kapasita foin’sae sira liu hosi formasaun siensia teknolojia, matematika, no enjineria.

“Programa solve for tomorrow ne’e, ida ne’e foin ami mai informa ba sua excelencia presidente katak ami sei hahu. Entaun significa seidauk iha formasaun antes husi Samsung ba iha joventude sira, maibe agora mak hanesan pasu aranka para ami atu halo ba tinan 5 ou tinan 10 oin mai atu apoio joven sira iha area sira ne’ebe ohin temi ne’e,” dehan Rhee In Yong.

Alende hato’o kona ba programa ne’ ebe Samsung iha, ema numeru ida iha Samsung ne’e mos konvida xefi estadu atu bele halo vizita ba iha Koreia Sul, inklui ba sira nia kompana.

‘’Hau mos husu ba sua excelensia presidente, karik nia iha biban atu visita Korea husu mos atu visita ami nia kompania Samsung iha Korea,” dehan Rhee In Yong.