Dili, www.news-viptv.com – Depois liu tinan tolu servisu diplomátiku iha Timor-Leste, Embaixadora Austrália, Caitlin Wilson, prepara atu remata nia misaun iha Dili, maibé relasaun estratéjika entre Canberra no Dili kontinua sai prioridade ba nasaun rua. Iha enkontru despedida ho Primeiru-Ministru Kay Rala Xanana Gusmão, Wilson destaca progresu kooperasaun bilaterál, inklui dezenvolvimentu projetu Greater Sunrise, no hato’o sentimentu katak Timor-Leste sei nafatin iha nia fuan maski nia mandatu diplomátiku remata ona.
Embaixadora Austrália iha Timor-Leste, Caitlin Wilson, hala’o enkontru despedida ho Primeiru-Ministru (PM), Kay Rala Xanana Gusmão, iha Palácio do Governo , Dili, sexta-feira (06/11), nu’udar parte hosi prosesu remata nia responsabilidade diplomátika iha Timor-Leste.
Hafoin enkontru, Wilson informa katak nia mandatu diplomátiku ne’ebé dura tinan tolu-resin iha Timor-Leste sei remata ofisialmente iha loron 13 Novembru 2026.
Nia konsidera períodu servisu ne’e hanesan tempu importante ida ba dezenvolvimentu relasaun entre Austrália no Timor-Leste, liuliu iha área kooperasaun bilaterál no parseria estratéjika.
“Ha’u-nia enkontru despedida ikus ho Primeiru-Ministru Kay Rala Xanana Gusmão, ha’u-nia mandatu tinan tolu ho balun iha Timor-Leste. Ida-ne’e sai hanesan períodu importante tebes iha relasaun entre Austrália no Timor-Leste,” Caitlin Wilson afirma iha Palásiu Governu.
Durante nia mandatu, Wilson hato’o katak nia sente onra no priviléjiu tanba hetan oportunidade atu servisu hamutuk ho Primeiru-Ministru Xanana Gusmão no Governu Konstitusionál Timor-Leste.
Nia mós destaca katak relasaun amizade entre nasaun rua kontinua di’ak no metin, liuliu liuhosi progresu iha dezenvolvimentu projetu importante sira, inklui Greater Sunrise, no área kooperasaun seluk ne’ebé Austrália no Timor-Leste promove hamutuk.
Projetu Greater Sunrise kontinua sai asuntu estratéjiku ida iha relasaun entre Austrália no Timor-Leste, liuliu iha esforsu atu dezenvolve rekursu petróleu no gás iha tasi Timor.
Dezenvolvimentu projetu ne’e iha importánsia ba futuru ekonomia Timor-Leste, tanba nia iha potensiál atu kontribui ba reseita nasionál, kriasaun empregu no dezenvolvimentu indústria enerjia.
Maibé, projetu ne’e kontinua depende ba negosiasaun no desizaun téknika, komersiál no polítika entre parte relevante sira.
Kooperasaun kona-ba Greater Sunrise hatudu katak relasaun Austrália no Timor-Leste la limita de’it ba amizade diplomátika, maibé mós envolve interese ekonómiku no dezenvolvimentu ba futuru nasaun rua.
Iha nia deklarasaun despedida, Caitlin Wilson mós hato’o sentimentu pesoál kona-ba nia esperiénsia servisu iha Timor-Leste, no admite katak nia sente triste atu husik nasaun ne’e.
“To’o ona tempu ba ha’u atu hakat ba ha’u-nia kapítulu tuirmai. Ha’u mós triste tebes atu sai. Timor-Leste sei hela nafatin iha ha’u-nia fuan. Ha’u sei la haluha Timor-Leste no esperiénsia furak ida-ne’e,” Wilson espresa.
Nia deklarasaun ne’e hatudu apresiasaun ba esperiénsia diplomátika no relasaun amizade ne’ebé nia dezenvolve durante tinan tolu-resin iha Timor-Leste.
Wilson sei remata ofisialmente nia misaun diplomátika iha loron 13 Novembru 2026, hafoin servisu nu’udar Embaixadora Austrália ba Timor-Leste durante tinan tolu-resin.
Partida Wilson nian marka rohan ba nia mandatu diplomátiku iha Dili, maibé relasaun entre Austrália no Timor-Leste sei kontinua liuhosi kooperasaun governu ba governu, parseria ekonómika no diálogu diplomátiku.
Ho istória relasaun besik no parseria ne’ebé dezenvolve durante tinan barak, Austrália kontinua sai parseiru importante ida ba Timor-Leste iha área dezenvolvimentu, ekonomia, edukasaun, seguransa no kooperasaun rejionál.
