Suva, Fiji, WWWNEWS-VIPTV.COM, — Austrália sei fornese drone marítimu Bluebottle ba Fiji atu atu ajuda deteta atividade sira ne’ebé suspeita hanesan tráfiku droga no atividade peska ilegal iha tasi, nu’udar parte husi esforsu atu hametin seguransa marítima iha nasaun Pasífiku ne’e.
Komisáriu Altu Austrália ba Fiji, Peter Roberts, hateten ba jornalista sira katak drone refere sei hametin vixilánsia marítima, depois de lansamentu Estratéjia Seguransa Marítima Fiji 2026–2035.
Roberts esplika katak embarakasaun sira ne’e ho naruk metru 7,5 uza enerjia husi loro-matan, anin no onda tasi, no bele hela iha tasi durante fulan ne’en to’o neen atu monitoriza atividade suspeita.
Nia hateten katak Fiji antes ne’e halo ona teste ba teknolojia ida-ne’e liuhusi utilizasaun temporária hamutuk ho Nova Zelándia, ho rezultadu ne’ebé pozitivu.
Ho esperiénsia ne’e, Austrália agora sei fornese embarakasaun sira ne’e ba Fiji atu uza permanentemente hodi reforsa seguransa marítima.
Maski nune’e, Roberts la revela númeru embarakasaun ne’ebé sei fornese no kustu total, tanba razaun seguransa. Autoridade sira hakarak mantein elementu surpresa bainhira hasoru atividade ilegal iha tasi.
Nia aumenta katak Austrália sei servisu hamutuk ho Fiji atu garante entrega embarakasaun sira ne’e lalais liu posível, inklui formasaun no apoiu tékniku ne’ebé presiza.
Iha parte seluk, Ministru Defeza no Asuntu Veteranu Fiji, Pio Tikoduadua, hato’o agradese ba Austrália tanba kontinua fó apoiu ba seguransa marítima Fiji. Nia subliña katak la iha nasaun ida mak bele proteje nia tasi mesak.
Tikoduadua esplika katak embarakasaun sira ne’e sei sai propriedade Governu Fiji nian, no la’ós atu uza exclusivamente de’it hosi Marinha Fiji.
Informasaun ne’ebé embarakasaun sira ne’e halibur sei ajuda mós ajénsia sira seluk ne’ebé hala’o knaar aplikasaun lei, atu kombate krime no proteje tasi Fiji.
Ministru ne’e konsidera apoiu ida-ne’e nu’udar pasu importante atu garante seguransa ba tasi no komunidade sira iha Fiji.
Tikoduadua mós hato’o agradese ba parseiru hotu ne’ebé kontribui ba lansamentu Estratéjia Seguransa Marítima Fiji, inklui Reinu Unidu no Programa Nasoins Unidas ba Dezenvolvimentu (UNDP).
Iha eventu lansamentu ne’e, reprezentante husi organizasaun rua ne’e mós halo intervensaun, mak Peter Thoman, Konselleiru no Xefe Programa Fundu Seguransa Integradu Reinu Unidu ba Pasífiku, no Rustam Pulatov, Líder Ekipamentu ba Governasaun Efetiva iha UNDP.
Kooperasaun ne’e hatudu esforsu hamutuk entre Fiji no parseiru internasionál sira atu hametin kontrolu tasi, prevene atividade kriminál no proteje rekursu marítimu iha rejiaun Pasífiku.
