Honolulu,WWW.NEWS-VIPTV — Membru FALINTIL-Forsa Defeza Timor-Leste (F-FDTL) na’in-rua partisipa iha kursu internasionál kona-ba Feto, Pás no Seguransa (Women, Peace and Security – WPS), iha Honolulu, Hawai’i, Estadu Unidus, hodi dezenvolve kapasidade profisionál no hametin kooperasaun militár ho parseiru internasionál sira iha rejiaun Ázia-Pasífiku.

Membru F-FDTL ne’ebé partisipa iha kursu ne’e mak Major David Santos no Kapitaun Marquita da Cunha. Kursu ne’e hala’o husi loron 5 to’o 16 Outubru 2026, organiza husi Komandu Indo-Pasífiku Estadus Unidus (United States Indo-Pacific Command – USINDOPACOM).

Programa formasaun ne’e halibur membru militár feto no mane na’in-30, reprezentante husi nasaun 20 iha rejiaun Ázia-Pasífiku, ho objetivu atu hasa’e komprensaun kona-ba ajenda Feto, Pás no Seguransa no nia aplikasaun iha setór defeza.

Kursu ne’e foka ba dezenvolvimentu kapasidade atu implementa ajenda Feto, Pás no Seguransa, hametin integrasaun ajenda ne’e iha instituisaun defeza, no kria rede kooperasaun entre nasaun sira atu promove pás no seguransa sustentável.

Partisipasaun membru F-FDTL na’in-rua iha formasaun internasionál ne’e sai oportunidade atu aumenta koñesimentu, fahe esperiénsia no haforsa relasaun ho parseiru internasionál sira, liuliu iha esforsu atu promove partisipasaun feto iha prosesu harii pás no hametin seguransa.