Avansadu Karketu Dili Hetan Xamada Tama Selesaun Nasional troka Gali Freitas

DILI, www.news-viptv.com – Avansadu Karketu Dili, Anjenuku Viegas hetan xamada tama selesaun nasional hodi troka pozisaun Gali Freitas ne’ebe labele reforza selesaun iha jogu play-off Hyundai Cup 2026 kontra Brunei Darrusalam.

Federasaun Futeból Timor-Leste, liuhosi treinadór prinsipál José Pedro Salazar fó sai katak Angenucu Viegas konvoka ona atu tama iha selesaun nasionál Timor-Leste hodi troka Gali Freitas ne’ebé kondisaun fíziku seidauk rekupera.

Diretur Selesaun Nasional, João Maneco Soares Amaral, informa katak simu ona konfirmasaun hosi jogadór Gali Freitas liuhosi WhatsApp iha dia 24 maiu 2026, katak nia la disponível atu reforsa Selesaun Nasional ho razaun kondisaun fíziku seidauk rekupera husi lezaun ne’ebé nia hasoru.

Atu prienxe pozisaun ne’e, treinadór selesaun nasionál Timor-Leste, José Pedro Salazar liuhosi reuniaun téknika decide bolu jogadór Angenucu Viegas, avansadu estrela Karketu Díli FC nian, hodi hametin ekipa antes jogu hasoru Brunei Darussalam iha Play-off Hyundai Cup 2026.

Angenucu Viegas iha tempu badak sei arrangka ba Malázia hodi hola-parte iha ekipa selesaun nasionál, ne’ebé oras ne’e hala’o hela akampamentu treinu (traning camp) iha Malázia.

Timor-Leste sei hala’o play-off hasoru Brunei Darussalam ho formatu home and away, ne’ebé sei hala’o iha loron 02 fulan Juñu no 09 Juñu 2026.

Anjenuku iha nia jopgu dahuluk hamutuk Karketu Dili hatudu performa diak hodi kontribui golu rua ba vitoria ekipa Matak Malirin wainhira halakon AS. Marka 4-2.

Antes ne’e Anjenuku Viegas joga husi Emmanuel FC ne’ebe iha Liga FFTL konsege lori Emmanuel FC sai kampiaun hafoin halakon Karketu Dili, klubu ne’ebe dadauk ne’e nia defende ba.