Kooperasaun Ekonomia sai Fokus Relasaun Bilateral entre TL ho Indonesia

Jakarta, www.news-viptv.com – Timor-Leste no Indonesia kontinua hametin no haforte relasaun bilateral iha vizita estranjeiru dahuluk Prezidenti Republika Jose Ramos-Horta iha Indonesia wainhira hasoru malu ho ho Prezidenti Republika Indonesia, Joko Widodo, Tersa (19/7/2022), iha Palasiu Prezidensial Bogor, Java Osidental, Indonesia.

Iha deklarasaun konjunta ba media sira, Presidenti Joko Widodo hateten katak akordu haat ne´ebe nasaun rua ne´e asina nudar sinal katak hanesan nasaun vizinu Indonesia kontinua nia komitmentu ba koperasaun bilateral ho Timor-Leste.

“Onra ida ba Indonesia bele simu vizita estrajeiru dahuluk Prezidenti Ramos-Horta. Ami koalia kona ba kooperasaun bilateral hirak ne´ebe ho nakloke no amizade. Haforsa kooperasaun ekonomia sai fokus ba kooperasaun entre nasaun rua,” dehan Prezidenti Joko Widodo.

Entertantu, Prezidenti Republika Jose Ramos-Horta hato´o nia agradesementu ba suporta Indonezia nian ba dezemvolvimentu Timor-Leste durante ne´e.

“Agradese ba suporta Indonesia nian iha dezemvolvimentu Timor-Leste nian, inklui iha área edukasaun no rekursu humanus,” dehan PR. Ramos-Horta.

Akordu kooperasaun haat ne´ebe Timor-Leste ho Indonesia asina  maka ba agrikutura nian, movimentu bus liu fronteira terreste, standarizasaun no metrologia, no ikus kooperasaun teknika iha área komersiu nian.