PR Ramos Horta Realiza Palestra Kona-ba Mudansa Klimatika

Dili, www.news-viptv.com – Prezidente no Lauriadu Nobel ba Pás, J. Ramos-Horta, organiza Série Palestra Prezidensiál ba tinan 2024 kona-ba Mudansa ho tema “Hamrik Hasoru Ameasa Klimátika,” iha Ministeriu Negósius Estranjeirus no Kooperasaun, Kuarta (20/03/2024).

Palestra ida ne’e halibur hamutuk polítiku seniór sira, akadémiku, diplomata, parseiru dezenvolvimentu sira, reprezentante setór privadu no sosiedade sivíl sira atu hasa’e konsiénsia públiku kona-ba impaktu katastrófiku husi mudansa klimátika ne’ebé Timor-Leste hasoru no halo advokasia ba asaun klimátika iha setór hotu-hotu.

Iha nia diskursu introdutóriu, Prezidente Ramos-Horta foka ba Alerta husi Mudansa Klimátika, Sensibilizasaun no asaun nesesáriu ba Timor-Leste. Nasaun ida ne’e esperiénsia rasik ona efeitu ladiak husi mudansa klimátika inklui produsaun agríkola ne’ebé menus, inseguransa  ai-han ne’ebé aumenta, falta bee, destruisaun infraestrutura, lakon vida no deslokasaun umanu.

“Mudansa klimátika nu’udar katastrófiku globál ida-ne’ebé presiza resposta global ida. Maibé nasaun ki’ik sira hanesan Timor-Leste labele hasoru dezafiu ezisténsia ida-ne’e mesak de’it. Ita presiza reforsa kooperasaun internasionál, transferénsia teknolojia, dezenvolvimentu kapasi no apoiu finanseiru atu aumenta reziliénsia, lori esforsu mitigasaun no adapta ba impaktu ne’ebé labele evita iha futuru,” dehan PR Ramos-Horta.

Prezidente Ramos-Horta agradese governu Timor-Leste ba nia envolvimentu ativu iha prosesu negosiasaun ONU nian kona-ba mudansa klimátika hodi  defende interese no influénsia desizaun internasionál sira hodi kombate mudansa klimátika, nia hatete iha Komunikadu Imprensa ne’ebe Viptv asesu.

Prezidente ezije Timor-Leste atu toma medidas iha dalan ba dezenvolvimentu hodi hamenus karbonu liu husi promosaun enerjia renovavel, habelar inisiativa reforestasaun, konservasaun jardín nasionál sira, no suporta programa florestál komunitária sira nian. Nia subliña nesesidade ba estratéjia klimátika ida-ne’ebé koordenadu ho parte hotu-hotu iha Timor-Leste, ne’ebé envolve governu, parseiru dezenvolvimentu, sosiedade sivíl, akadémiku, setór privadu no komunidade sira atu promove sidade no infraestrutura sira ne’ebé reziliente ba klima iha nasaun laran tomak.