Anin Sobu Uma Komunidade Ida Iha Uaimori

DILI, www.news-viptv.com – Komunidade ida nian uma iha Aldeia Mea-uain Suku Uaimori, Postu Administrativu Viqueque, Munisipiu Viqueque hetan estragus hafoin anin bo’ot ne’ebe akontese iha Sexta (26/1/2024) dadersan tuku 5.30 madrugada.

Octavio Savio Rangel Pereira Gomes maka nu’udar vitima ba uma refere via telefoni esplika, hafoin anin bo’ot nia uma hetan estragus iha parte kakuluk anin sobu hodi rib aba rai hotu.

“Ha’u sente triste tebes tamba fatin ne’ebe ami hodi deskansa kalan nian no fatin ne’ebe hodi hamahan aan ba, hetan estragus husi anin boot ne’e tamba ne’e hakarak husu ba parte relevante atu apoiu netik ami ba nune’e bele hadia fila-fali ami nia hela fatin ne’e,” dehan Octavio.

Tuir kronoligia akontesimentu katak komunidade refere sei dukur maibe iha dader ne’e anin ho velosidade makaas sobu hela fatin refere halo vitima sira paniku hodi halai sai husi uma laran.

“Anin sobu ami nia uma tamba ohin dader tuku 5:00 madrugada ami sei toba hela hakfodak mai sobu kalen uma sira ne’e ami halai sai ba liu haree fali iha uma leten la iha ona kalen,” vitima haktuir.

Aliende ne’e mos Xefe Aldeia Mea-Uain, Agosto Rangel afirma nia rekolla ona dadus balun hodi informa ona ba xefi suku tamba ne’e nia parte husu atu bele solusiona ba problema refere.

“Ohin dezastre ne’e akontese ha’u mai foti ona dadus ona no ha’u informa ba xefe suku hodi ba fo hatene ona ba Protesaun Sivil Munisipiu Viqueque tamba ne’e hanesan autoridade lokal husu boot sira atu apoiu lalais vitima ne’e nune’e sira bele hela fali ba,” relata Xefe Aldeia ne’e.

Maski dezastre ne’e estragus nia uma, nia relata laiha familia ida maka hetan kanek ou grave.