APC rejista 386 Uma Hetan Impaktu hosi Inundasaun 9 Janieiru

DILI, www.news-viptv.com – Udan bo’ot ne’ebe akontese iha 9 Janieiru 2024, liliu iha Kapital Dili fo impaktu ba komunidade nia uma hamutuk 386 maka be’e tama.

Autoridade Proteção Civíl (APC) liu hosi konferensia imprensa informa, inklui inundasaun Dili, hosi period 9 to’o 15 Janieiru 2024, APC rejistu komunidade nia uma hamutuk xefi famílias 432 no ema nain rua mate tamba impaktu hosi dezastre naturais ne’e.

“Atualizasaun dadus ba semana ida, hahú iha loron 09 to 15 Janeiru 2024 durante Semana ida ne’e, iha rejiaun Timor-Leste normal no akontese tipu dezastre maka CNOPC-APC rejistu uma hamutuk Xefi famílias 432 mak hetan estragus liu-liu iha Munisipiu sira hanesan tuir mai ne’e : Munisipiu Ainaro (Be’e sae estragus uma 1, ema kanek 8 no mate 1), Atauro (Anin sobu uma 1), Bobonaro (Anin sobu uma 7), Munisipiu Covalima (Anin sobu uma 1, Be’e Sae 4), Municipiu Dili (Ahi han 1, Be’e sae 386), Ermera (Anin sobu uma 1, Inundasaun uma 2, mate 1), Munisipiu Liquiça (Anin Sobu uma 4, be’e sae estragus uma 17), Municipiu Manatuto (Anin sobu Uma 1), Municipiu Manufahi (anin sobu uma 1), RAEOA (Ahi Han Uma 1), Municipiu Viqueque (Anin Sobu Uma 4),” esplika Diretór Gabinete Relasaun Externa no Komunikasaun (GREC), Cesario da Silva Marques ba jornalista sira, Segunda (15/1/2024) iha edifisiu APC, Kaikoli, Dili.

Ba Munisípio Dili, vitima sira seidauk hetan apoio emerjénsia ho razaun katak ekipa APC sei hare hamutuk ba dadus final hodi bele resposta ba iha familia vítima sira liga ho inundasaun foin lalais ne’e, bazeia ba tipo dezastre ne’ebé kategoria tuir lei protesaun sivíl.

“Ba apoiu emerjénsia Munisípiu 10 komandu Autoridade Protesaun Sivíl ho parseiros sira apoio ona assinténsia emerjénsia ba iha vítima sira,” dehan Porta Voz APC nian ne’e.

Sentru Nasional Operasaun Sivíl (CNOPC-APC) mos apela ba komunidade sira atu hadok an husi fatin ne’ebé konsidera risku ba dezastre wainhira udan ho intensidade makas, anin bot no rai nakdoko.

“Wanhira udan mai makas liu husi orás di’ak buka evakua lalais ba fatin seguru no gurada dokumentus importante sira iha fatin ne’ebé as,” nia dehan.