Hakotu I’is Avo Maria da Silva La Konsege Haree Uma Husi PR

DILI, www.news-viptv.com – Avó Maria da Silva, terseira idade residente iha Uaguia, Posto Administrativu Ossu, Munisípiu Viqueque, ne’ebe Presidensia Republika hari’i hela uma ba nia, hakotu ona nia vida iha loron 08 Abril 2026 tanba kondisaun moras.

Iha komunikadu imprensa ne’ebe redasaun simu, esplika, Avó Maria nia destiñu akontese iha momentu ne’ebé nia seidauk konsegue aproveita uma mahon ne’ebé konstrui hela husi Prezidénsia Repúblika.

Uma mahon refere, ne’ebé agora dadaun sei iha faze konstrusaun, konstrui husi Ekipa Komunitária Unidade Servisu Sosiedade Sivil no Asuntu Sosiál (SSAS) Prezidénsia Repúblika, tuir pedidu husi autoridade lokál. Inisiativa ida ne’e hahú tiha ona ho serimónia lansamentu “Primeira pedra” iha fulan Marsu 2026.

Durante ne’e, Avó Maria hela iha uma ho kondisaun ladún di’ak, hamutuk ho nia oan mane ida, José Barros, ne’ebé mos sofre ho problema saúde mental. Iha situasaun ne’e, família no viziñu sira mak kontinua tau matan ba sira ho sentidu apoiu solidariedade.

Pedidu hodi hetan uma mahon ne’e mai husi inisiativa joven sira iha bairro laran, observa direta ba familia ne’e nia kondisaun, nune’e sira koopera hamutuk ho autoridade lokal, hodi halo Pedidu ida  lori ba Prezidente Repúblika, J. Ramos-Horta. Liu husi Unidade Asuntu Sosiál (SSAS) Prezidénsia Repúblika hodi responde direta ho asaun konkreta liu husi konstrusaun uma refere.

Maski Avó Maria la konsegue haree Uma ne’e nia finalidade, maibé família kontinua hato’o agradesimentu ba Prezidente Repúblika tanba apoiu ne’ebé fó ona, inklui ajuda ba prosesu funeral.

Iha kontestu ne’e, Prezidénsia Repúblika kontribui mos apoiu finanseiru ba seremónia funeral, inklui ai-han no nesesidade básika hanesan foos (25 kg saka-5), mina bimoli (5 litru, kaixa 2), supermie (kaixa-5), manutolun (kaixa 1) no osan cash hamutuk $250. Husi montante ne’e, $50 uza hodi sosa ai-funan no restante $200 entrega ba família, liu husi oan feto no oan mane José Barros.

Autoridade lokal no komunidade sira espera katak konstrusaun uma mahon ne’e bele kontinua to’o remata, hodi sai patrimóniu importante ida ba família ne’ebé hela iha kondisaun vulnerável iha área refere.