KSTL Husu Governu Lei ba Traballu Domestika no Asediu Violensia iha Servisu Fatin

Dili, www.news-viptv.com – Konfederasaun Sindikati Timor-Leste (KSTL) nu’udar mahon ba traballador sira husu nafatin ba governu atu halo Lei ba Traballdu Domestika no Lei ba Asediu Violensia iha servisu fatin, inklui ratifikasaun ba konvensoens internasional sira relasiona ho diretu traballador sira nian.

“Problema falta legislasaun sira hanesan Lei ba Traballu Doméstika, Lei ba Asediu Violensia iha servisu fatin, i konvensoens internasionál sira ne’ebe mak durante ne’e ita propoin, tamba konvensoens ne’e reforsa lei nasionál, husu ba estadu atu absita konvensaun sira ne’e,” hateten Prezidente KSTL, Almerio Vila Nova ba jornalista sira, Sexta (1/5/2026) iha areadores liur Palacio do Governo, Dili, iha ambitu komemorasaun Loron Mundial Traballador nian.

Marsa ne’ebe KSTL organiza, nia esplika, hodi fasilita lian traballador sira no ejiji nafatin ba mudansa salariu minimu ne’ebe la dignifika dignifika traballador sira iha sira nia servisu.

“Iha momentu importante ida-ne’e, la’os de’it traballadór sira atu hato’o sira  ezizensia de’it, maibé traballadór sira mos konsolida sira nia forsa, hateten ba governu katak, politika governu nian ne’e, tenki responde ba nesesidade traballadór ho ninia familia. Liu husi konsolidasaun 1 de maiu, hakarak husu na governu kria politika no programa ne’ebe maka, fo benefisiu ba traballadór sira, hahu husi traballadór setor privadu, nomos setór imformal. Realidade politika governu nian seidauk koresponde ba problema lobuk ida-ne’ebe mak akontese iha relasaun traballu iha area laborál ne’e,” nia hateten.

Reprezentante Traballadór, Madalena Lay da Conceição Dias ba jornalista sira hateten, nu’udar traballador ejiji nafatin ba governu atu hare mos ba direto traballador sira, inklui traballador feto sira.

“Ami husu ami nia lei feto Traballadór ne’e nian tau iha ne’ebe?, governu labele taka matan mai ami, loke netik matan mai feto Traballadór sira, no ami nia maluk sira ne’ebe servisu iha rai liur ne’eba ne’e, dala barak sira toba iha Jardim, servisu laiha,” dehan Madalena.

Nia rekomenda ba governu atu loke kampu traballu iha Timor-Leste atu nun’e Timoroan sira bele hetan servisu iha nia rai rasik no bele resolve Timoroan sira iha rai liur ne’ebe sedauk iha servisu bele fila fali hodi hamutuk servisu iha nia rai rasik.

Superintendente Asistente Polísia José Luís Amaral nu’udar Komandante Operasaun Polísia Nasionál Timor-Leste (PNTL) Munisípiu Dili hateten, komemorasaun Loron Mundial Traballador iha Kapital Dili lao ho hakmatek no hetan kooperasaun diak ho traballador sira ne’ebe manifesta sira nia lian.

“Ha’u hanoin papel PNTL nian ne’e sempre fo apoiu, ne’ebe atividade sira ne’e sempre maksimu, no ami koloka ami nia membru iha dalan dalan, nomos parte tranjitu par hare’e liu ba roda viariu, tamba ami sei blokeia dalan balu ne’ebe mak sira liu ba, maibé ohin loron ita hare buat hotu-hotu lao ho diak, tamba kolduasaun entre KSTL ho PNTL lao diak teb-tebes,” dehan offisias polisia ne’e.