Membru Komisaun B Parlamentu Nasional Vizita Komando UPM

DILI, www.news-viptv.com –  Membru Komisaun B Parlamentu Nasional ne’ebe trata ba asuntu Asuntu Defesa, Seguransa no Negosiu Estranjeiru iha loron kuarta-feira (15/4/2026) hala’o vizita ba iha Komandu Unidade Polísia Maritima (UPM) Polísia Nasional Timor-Leste (PNTL) hodi hare’e direita kondisaun Unidade ne’e nian inklui rona preukupasaun ne’ebe maka hasoru durante ne’e.

Prezidente Komisaun B Parlamentu Nasional Domingos Augosto ‘Deker’ iha entrevista hateten aktividade ne’e hanesan kontinuasaun husi vizita fiskalizasaun ne’ebe Komisaun B define iha ninia planu no programa.

“Iha biban ida ne’e, objetivu maka mai atu rona pontu situasaun sira aktual no mós situasaun em jerál ne’ebe Unidade Polísia Maritima hasoru iha kna’ar loron-loron nian, nune’e mós iha biban ida ne’e Komisaun Asuntu Defesa, Seguransa no Negosiu Estrangeiru nu’udar reprezentante Povu ne’ebe tau matan ba area Defesa, Seguransa no Negosiu Estrangeiru ami hakarak rona nafatin sira nia preukupasaun ne’ebe liga ba sira nia nesesidade sira, oinsa maka bele suporta sira iha kna’ar loron-loron nian”, afirma Prezidente Komisaun B Parlamentu Nasional ne’e iha notisias ne’ebe publika husi PNTL.

Domingos Augosto ‘Deker’ akresenta liu tan iha biban ne’e liu husi aprezentasaun ne’ebe halo husi Komandante Unidade ninian, ami halo rezumu katak tebes duni, sira iha difikuldade pontu rua maka hanesan rekursu umanu ne’ebe tuir ita hotu hatene katak limitadu.

“Difikuldade seluk maka fasilidade ne’ebe ohin aprezenta husi Komandante Unidade no ami simu ona nu’udar relatoriu badak husi Komandu UPM ne’ebe Komisaun B nia parte sei elabora nu’udar relatoriu hato’o fila fali ba iha Ministeriu kompotente no mós Komandu PNTL, oinsa tenta ho meius ne’ebe Instituisaun ne’e iha atu bele koloka ba Orsamentu Jerál Estadu ne’ebe sei hala’o iha Planu Orsamentu Jerál Estadu 2026 nian tinan tuir mai”, hatutan Membru Parlamentu Nasional ne’e.

Entretantu, Komandante UPM Superintendente Xefe Polísia Eugenio Perreira iha entrevista hateten ohin iha vizita ne’e, Komandu UPM iha ninia aprezentasaun ne’ebe hato’o ba Membru Komisaun B maka asuntu ne’ebe pertinente no Estratejiku.

“Liu-liu kona-ba iha aktividade UPM ninian no mós kona-ba ninia susesu no dezafiu sira, prinsipalmente ami mós hakarak atu konvense Deputadu sira kona-ba importansia husi prezensa Estadu ninian iha zona Maritima liu husi asaun seguransa ne’ebe maka ezerse husi UPM ba iha âmbitu seguransa ninian”, haktuir Komandante UPM ne’e.

Superintendente Xefe ne’e salienta liu tan tanba ne’e iha ninia informasaun sira no mós iha ninia aprezentasaun sira ne’ebe ami aprezenta além de koalia kona-ba ami nia servisu iha âmbitu seguransa iha zona maritima, ami mós koloka ba iha situasaun sira ne’ebe maka ita bele dehan katak iha ninia dezafiu balun ne’ebe sempre difikulta ba iha ezekusaun misaun ne’ebe pertinente ba iha komptensia UPM ninian, maibé ami nafatin hatudu, ami nia prontidaun hodi hala’o nafatin ami nia kna’ar no difikuldade sira ne’e ami la tau hanesan obstakulu ba iha ami nia implementasaun iha ami nia kompetensia sira.

Iha vizita ne’e, Membru Komisaun B Parlamentu Nasional simu direita husi Inspetúr Jerál PNTL Komisariu Assistente Polísia Hermenegildo Gonçalves da Cruz, Komandante UPM Superintendente Xefe Polísia Eugenio Perreira, Segundu Komandante UPM ho estrutura inklui Membru UPM tomak.