Incheon,Koreia-Sul, wwwnews-viptv.com – Polísia Nasionál Timor-Leste (PNTL) buka oportunidade kooperasaun internasionál hodi haforsa modernizasaun institusionál no aumenta kapasidade operasionál, liuhusi partisipasaun Inspetór-Jerál PNTL, Komisáriu Asistente Polísia Hermenegildo Gonçalves da Cruz, iha Expozisaun Internasionál Polísia Nasionál Koreia-Sul, ne’ebé hala’o iha Songdo, Incheon, husi loron 21 to’o 23 Outubru 2026.
Iha expozisaun ne’e, delegasaun PNTL hetan oportunidade atu haree diretamente teknolojia no ekipamentu polísia modernu, inklui farda, viatura, ekipamentu seguransa, sistema Teknolojia Informasaun no Komunikasaun (TIK), no Inteligénsia Artifisiál (IA), ne’ebé bele kontribui ba hadi’a efisiénsia servisu no hametin seguransa públika iha Timor-Leste.
Partisipasaun ida-ne’e iha objetivu atu haforsa koñesimentu kona-ba dezenvolvimentu teknolojia no ekipamentu polísia nian, no mós buka oportunidade hametin kooperasaun ho instituisaun no empreza internasionál sira, hodi apoia modernizasaun no hadi’a kapasidade operasionál PNTL iha futuru.
Durante expozisaun ne’e, Inspetór-Jerál PNTL halo vizita ba pavilhaun no estande expozisaun sira atu haree diretamente produsaun farda polísia, ekipamentu seguransa, viatura polísia, no fasilidade Teknolojia Informasaun no Komunikasaun (TIK), inklui teknolojia Inteligénsia Artifisiál (IA).
Vizita ne’e sai oportunidade importante ba PNTL atu aprende kona-ba inovasaun teknolojia foun no sistema modernu sira ne’ebé bele kontribui ba hadi’a efisiénsia servisu polísia, aumenta kapasidade operasionál no hametin seguransa públika.
Aleinde vizita ba expozisaun, Inspetór-Jerál PNTL mós hala’o enkontru no diskusaun negosiasaun ho reprezentante husi na’in ba empreza sira hamutuk 8, inklui fábrica manufatura no kompania sira ne’ebé fornese ekipamentu no solusaun teknolojia ba área seguransa.
Enkontru sira-ne’e iha ho objetivu atu esplora possibilidade kooperasaun iha futuru, liuliu iha área fornese farda, ekipamentu polísia, viatura, no teknolojia modernu sira ne’ebé bele responde ba nesesidade PNTL. Ho inisiativa ida-ne’e mós hatudu esforsu PNTL atu buka parseiru internasionál sira hodi suporta dezenvolvimentu institusionál no hasa’e kualidade servisu ba povu.
Iha loron ikus nia vizita, Inspetór-Jerál PNTL, Komisáriu Asistente Polísia Hermenegildo Gonçalves da Cruz, vizita mós Embaixada Repúblika Demokrátika Timor-Leste iha Seoul, Repúblika Koreia, hodi halo vizita kumprimentu no enkontru ho Embaixadór Timor-Leste, António Benevides.
Enkontru ne’e sai oportunidade atu hametin relasaun institusionál no troka hanoin kona-ba importánsia relasaun diplomátika no kooperasaun entre Timor-Leste no Repúblika Koreia, inklui iha área seguransa no dezenvolvimentu kapasidade institusionál.
Partisipasaun PNTL iha eventu internasionál ida-ne’e reprezenta esforsu kontínuu instituisaun nian atu akompaña mudansa teknolojia iha área seguransa, haforsa ligasaun ho parseiru internasionál sira no buka oportunidade kooperasaun ne’ebé bele kontribui ba modernizasaun PNTL no prestasaun servisu polísia ne’ebé profisionál, efisiente no efetivu ba komunidade.
