Dili www.news-viptv.com, – FALINTIL-Forsa Defesa Timor-Leste (F-FDTL) no Forsas Armadas Reinu Tailándia hametin relasaun kooperasaun iha área defeza liuhusi diálogu, troka esperiénsia no hasa’e kapasidade institusionál militár.
Kompromisu ne’e mosu iha enkontru entre Xefe Estadu Maior Jenerál F-FDTL, Tenente-Jenerál Falur Rate Laek, ho Xefe Estadu Maior Jenerál Forsas Armadas Reinu Tailándia, Jenerál Ukris Boontanondha, hamutuk ho nia delegasaun, iha Kuartel Jenerál F-FDTL, Fatuhada, Dili, tersa-feira (10/11/2026).
Enkontru ne’e sai momentu importante ida atu hametin relasaun amizade no parseria entre nasaun rua, liuliu iha dezenvolvimentu kooperasaun téknika militár.
Aleinde haforsa relasaun diplomátika no institusionál, parte rua mós konsidera diálogu konstrutivu, troka esperiénsia no koñesimentu iha área defeza no seguransa nu’udar elementu importante atu dezenvolve kooperasaun bilateral.
Kooperasaun ne’e espera bele dezenvolve kapasidade institusionál, hasa’e koñesimentu profisionál no hametin kolaborasaun entre forsas armadas nasaun rua.
Liuhusi parseria ida-ne’e, Timor-Leste no Tailándia espera kontinua hasa’e kontribuisaun hamutuk ba manutensaun dame, estabilidade no seguransa iha rejiaun.
