Governu Sei Reloka Vitima Insendiu sai hosi Cobe House Prezidensial

DILI, www.news-viptv.com – Governu liu hosi Sekretaria Estadu Protesaun Sivil (SEPS) hamutuk ho Ministeriu Administrasaun Estatal sei reloka vitima insendiu Karantina-Tasitolu hamutuk uma kain 39 ne’ebe durante ne’e hela provizoriu iha Cobe House Prezidensial. 

Sekretariu Estadu Protesaun Sivil, Domingos Mariano Reis ba jornalista esplika katak prosesu relokasaun vitima insendiu karantina ne’e ba sira sasan kontrusaun uma sei responsabiliza hosi Ministeriu Administrasaun Estatal (MAE).

“Iha ne’e prezensa diretor jeral nian iha ne’e e ohin ami konkorda ona katak aban ho bairua sira ami hasai hotu ona husi sira nia hela fatin ida ne’e no ami sei lori fila sira ba sira nia fatin,” dehan Domingos Reis hafoin fahe sasan emerjensia ba vitima insendiu karatina, Kuarta (24/1/2024), iha areadores Palasiu Prezidensial, Bairo Pite, Dili.

Governante ne’e esplika, vitima insendiu ne’e sei fila fali ba sira nia munisipiu orijin hanesan Ermera, Bobonaro, Baucau, Aileu no Dili.

“Ba material konstrusaun sei entrega ba estatal maka sei konstrui to remata no intrega ba sira,” dehan Domingos Reis.

Domingos Reis esplika, iha insendiu Karantina nian, iha grupu rua ne’ebe governu evakua bai ha Sentru Evakuasaun COVID iha Tasi Tolu hamutuk xefi familia 11 no grupu ida seluk hamutuk xefi familia 39 iha Cobe House Prezidensial nian.

Antes ne’e ba xefi familia 11 iha Sentru Evakuasaun COVID, APC mos reloka ona sira ba munisipiu orijin no apoia ona pakote kontrusaun hodi harii sira nia uma ida-idak.