Abril, APC Halo Rekuperasaun ba Uma 497

DILI, www.news-viptv.com – Autoridade Protesaun Sivil (APC) iha Abril 2025 sei halo rekuperasaun ba uma komunidade nian nain 497 ne’ebe hetan estraga husi dezastre naturais iha tinan 2024.

Xefi Seksaun Komunikasaun GREK-APC, Nelson Nunes Orleans iha konferensia imprensa, segunda (17/3/2025) esplika, rekuperasaun uma 497 ne’e la inklui lista Munisipiu Ermera no Manatuto nian.

“Hau hakarak hateten deit katak iha fulan Abril nia laran sei halo rekuperasaun ba uma hamutuk 497 ne’ebe sei halo husi Autoridade Protesaun Sivil ba uma sira ne’ebe hetan afetadus ba dezastre naturais ba iha tinan kotuk nian. Ho biban ida ne atu hateten deit katak sei halo ba familia hamutuk 497 la inklui munisipiu ermera ho manatuto,” informa Nelson Orleans iha Edifisiu APC, Kaikoli, Dili.

Ba komunidade nian uma ne’ebe hetan estraga husi periodu Janieiru to’o Marsu 2025, dadauk ne’e iha ona prosesu verifikasaun, ne’ebe sempr elao hamutuk ho autoridade local tantu Xefi Aldeia no Xefi Suku.

“Iha tinan ida ne’e sei foku liu ba iha tinan kotuk nian ne’ebe ohin hau temi, 497,” esplika Nelson.

Iha konferensia imprensa ne’e, fo sai mos dadus dezastre naturais ne’ebe estraga komunidade nia uma durante periodu 10 to’o 17 Marsu 2025, APC rejista hamutuk uma 15 ne’ebe hetan estraga tamba anin bo’ot, ahi han 1, no rai halai 2. Ho numeru ema afetadus hamutuk ema nain 60,  ema evakua 3, prienxe kriteira 16.

Uma komunidade ne’ebe hetan estragus ne’e rejista husi Munisipiu Baucau anin sobu uma 11 no ahi han uma 1.  Munisipiu Bobonaro rai halai uma 1, Munisipiu Vikeke anin sobu uma 1.