Uma 22 iha RAEOA Hetan Sobu Tamba Anin Bo’ot

Dili, www.news-viptv.com – Uma komunidade nian iha RAEOA hamutuk 22 hetan estragus tamba impaktu anin bo’ot ne’ebe Autoridade Protesaun Sivil (APC) rejista iha periodu 10 to’o 17 Novembru 2025.

Ho estragus uma 22 ne’e, durante periodu refere, alende akontese iha RAEOA, APC rejista total uma 37 maka hetan estragus.

Iha konferensia imprensa Xefi Seksaun Komunikasaun GREC, Genoveva Fernandes Almeida informa munisipiu ne’ebe afetadu maka Aileu, Baucau, Bobonaro, Ermera, Lauten, Manufahi, RAEOA, no Viqueque.

Husi munisipiu ne’e, Aileu rejista anin sobu uma 1, ahi han uma 1, Baucau anin sobu uma 2, Bobonaro anin sobu uma 1, Ermera anin soba uma 1, Lautem ahi han uma 2, Manufahi ani han uma 1, RAEOA anin sobu uma 22, ahi han uma 3, no Viqueque anin sobu uma 2, ahi han uma 1.

“Numeru ema afetadus 169, uma estragus 37, ahi han uma 8, anin sobu 29. Priense kriteria 11, apoiu deit emerjensia 26, ema evakua 13,” dehan Genoveva Almeida, Segunda (17/11/2025), iha edifisiu APC Kaikoli, Dili.

Ho dezastre ne’e, nia esplika Komando APC Munisipiu ho parseirus relevante fornese asistensia emerjensia ba família afetadus sira mak hanesan Ai-han no laos Ai-han. Komando Operasional APC Munisipiu sira sei kontinua halo hela levantamentu detaillus kona-ba sasan ne’ebe estragus no lakon.