Rai Lakan Hamate Armando dos Santos

DILI, www.news-viptv.com  – Armando dos Santos, idade tinan 36 ne’ebe servisu nu’udar manorin hakotu iis hafoin kona rai lakan ne’ebe akontese iha 8 Janieiru 2025, Iha Munisipiu Bobonaru, Postu Maliana, Suku Tapamemo, Aldeia Lepobuel.

“Vitima Armando ne’e mate tamba kona rai lakan wainhira fila hela rai ka halo natar,” hateten Xefi Seksaun Komunikasaun iha Gabinete Relasaun External no Komunikasaun Autoridade Protesaun Sivil (APC), Nelson Orleans ba VIP TV, Segunda (13/1/2025).

Iha konferensia imprensa, Nelson informa Sentru Nasional Operasaun Protesaun Sivil (CNOPC, sigla Portugues) hahu iha 6 to’o 13 Janeiru 2025, akontese tipu dezastre hanesan Be’e Sa’e 4, Ahi Han 1, Anin Bo’ot 13, Rai Halai 2.

“Priense kriteria 8, apoiu emerjensia 12, mate 1, numeru afetadu 95, ema evakua 13,” nia hateten.

Rai Halai ne’ebe APC rejista ne’e akontese deit iha Munisipiu Ainaro iha Suku Maulau ne’ebe uma komunidade ida maka hetan estragus.

Entertantu anin sobu akontese iha Munisipiu Baucau 1 maka iha Suku Bilibau. Ermera uma 3 hetan estragus, ida la tama kategoria makai ha Suku Riheu. Uma 2 seluk maka 1 iha Suku Lisapat 1, no 1 iha Suku Potete.

Nune’e mos estragus tamba anin sobu relata mos iha Munisipiu Lautem ne’ebe akontese 1 iha Suku Lakawa Luro, Liquisa 2 akontese iha Suku Metagou-Bazartete 1 no Suku Guico-Loes 1. Munisipu Manufahi mos relata uma komunidade rua maka hetan estragus ne’ebe rejista iha Same husi Suku Letefoho 1, no Suku Babulo 1. Ikus maka iha Suku Luca, Munisipiu Viqueque mos uma 1 hetan estragus.

Ba be’e sa’e APC rejista uma 3 iha Suku Suku Betulale, Vemasse, Munisipiu Baucau no Uma ida iha Suku Maina-2, Com, Munisipiu Lautem hetan estragus tamba ahi-han.