Lansa Projetu BSRP Daruak, SPC Apoia € 550,000 ba Timor-Leste

Dili, www.news-viptv.com – Pacific Community (SCP) ou Komunidade Pasifiku apoia osan ho montante € 550,000 ba Timor-Leste hodi lansa projetu Harii Seguransa no Reziliensia iha Pasifiku (BSRP – The Building Safety and Resilience in the Pacific).

Lansamentu projetu BSRP ne’e lansa iha edifisiu Autoridade Protesaun Sivil (APC), Kinta (29/2/2024) ho asina memorandum of understanding ne’ebe asina hosi Prezidenti APC, Superintendente PNTL, Ismael da Costa Babo no Vise Direktor Jeral Siensia no Kapasidades SPC, Dr. Paula Vivili no assiti hosi Sekretariu Estadu Protesaun Sivil, Domingos Mariano Reis no Adjunto Xefe Misaun Uniaun Europeia iha Timor-Leste, Christoph Sorg

Projetu BSRP Daruak ne’ebé finansia husi Fundu Europeia ba Dezenvolvimentu ba da-11 ho totál fundus ho valór miliaun € 14, husi valór ne’e € 550,000 mak aloka ba Timor-Leste, hanesan kontinuasaun ida husi esforsu sira dahuluk ne’ebé hahú husi hamenus impaktu dezastre nian iha rejiaun ne’e. Projetu kolaborativu ida-ne’e envolve ajénsia sira husi Pais Illa Pasifiku 15 (PICs, sigla Inglés), iha ámbitu Intra-ACP Programa Redusaun Risku Dezastre Natural (NDRRP, sigla Inglés).

“Projetu ne’e sei implementa iha Munisipiu Viqueque no Covalima ne’ebe hosi observasaun munsipiu rua ne’e sempre akontese dezastre natural inundasaun,” informa Sup. Polisia Isamel da Costa Babo ne’ebe isplika projetu dahuluk SPC apoia ba instalasaun ekipamentu tore alerta tsunami, sentru evakuasaun Viqueque no rehabilitasaun sentru evakuasaun Covalima.

Objetivu metas hirak nee inklui hadi’a Jestaun ba risku no dezastre iha Timor-Leste, hasa’e reziliensia multisetorial no prontidão ba resposta no rekoperasaun ne’ebé ho effisiensia, no promove partisipasaun inkluziva iha dezeñu, implementasaun no avaliasaun projetu nian.

“Hafoin asina MoU iha loron 4 janeiru 2024, ami iha kompromisu tomak atu implementa projetu BSRP II ho susesu. Inisiativa ida-ne’e importante tebes atu hasa’e ita-nia jestaun ba risku dezastre, harii reziliensia multisetorial, no asegura partisipasaun inkluziva iha ita-nia esforsu atu kombate efeitu dezastre no mudansa klimátika,” dehan Sekretariu Estadu Protesaun Sivil, Domingos Mariano Reis iha nia deskursu.

Reprezentante Uniaun Europeia ba Timor-Leste, Vise-Xefe Misaun, Christoph Sorg mos fahe ninian hanoin kona-ba inisiativa husi projetu, hanoin sira ne’e refleta husi dezafiu ne’ebé Timor-Leste hasoru durante siklon tropikal Seroja iha tinan 2021 no fó ênfaze ba projetu ne’e nia papél atu hametin reziliensia iha rejiaun Pasifiku. “Projetu BSRP II reprezenta ita-nia esperansa koletiva no reziliensia, ho objetivu atu hametin ita-nia preparasaun no resposta ba dezastre sira,” dehan Christoph Sorg.

Tanba rejiaun Pasifiku sei kontinua hasoru ameasa barak liu-tan husi dezastre naturál no mudansa klimátika, lansamentu projetu BSRP II marka ona hakat ida-ne’ebé signifikativu no esforsu koletivu atu proteje no hasa’e reziliensia komunidade sira-nian. Liuhusi parseria no kolaborasaun, Timor-Leste no ninia viziñu sira iha Pasifiku sei haka’as an atu hamenus impaktu dezastre nian no asegura futuru ida-ne’ebé seguru liu ba jerasaun sira tuir mai.

BSRP dedika ona atu ajuda harii reziliensia ba dezastre no mudansa klimátika ba komunidade, governu no nasaun sira iha rejiaun Pasifiku tomak.