Vitima Insendiu Karantina Tasitolu Uma Kain 11 Desidi Fila ba Munisipiu

DILI, www.news-viptv.com  – Vitima insendiu karantina Tasitolu, Munisipiu Dili hamutuk uma kain 11 desidi ona ba governu hodi fila ba sira nia munisipiu ida-idak.

Dezisaun fila ba munisipiu, vitima insendiu sira disidi hafoin konkorda simu apoiu material no osan ho montante US$ 1,000 hosi Autoridade Protesaun Sivil (APC) ne’ebe entrega dereta hosi Sekretariu Estadu Protesaun Sivil, Domingos Mariano Reis liu hosi seremonia official ne’ebe realiza iha Karantina Tasi Tolu, sexta (15/12/2023).

Uma kain 11 ne’e sei fila hikas ba sira nia munisipiu orijen. uma kain 6 desloka ba munisípiu Ermera, uma kain 3 ba Munisípiu Bobonaro, uma kain ida ba RAEOA no uma kain ida iha Suku Dare, Munisípiu Dili.

“Ohin ami entrega ona material pakote ba uma ida nian ho osan montante rihun ida no mos hahan ba família vítima sira tamba semana kotuk ami konfirma ona ho sira. No sira mos aseita katak hakarak fila ba munisípio. Entaun tuir Lei No 7.20/2020 hateten katak waihira sidadaun ida afeta ba kazu desastre nia iha direito hetan osan rihun ida, enkuantu osan ne’e ba parte rua mak mao de obra no ba transporte,” informa Domingos Mariano Reis ba jornalista sira hafoin entrega sasan ba vítima sira.

Material no osan ne’ebe vítima sira hetan, esplika sekretariu estadu ne’e tenke halo uma duni no lei la autoriza vitima sira uza osan no material sira halo fali buat seluk.

“Nuno governu konstitusionál ne’ebé lidera hosi Maun Boot Kayrala Xanana Gusmão nafatin fo soliedaridade ba ita-boot sira, maibé ita-boot sira mós tenke hari’i ona uma, labele hein, labele husik hela, labele fó empresta kalen ba ema seluk, labele faan sasan sira ne’e, maibé uza hari’i uma hodi proteje ita-boot sira hosi udan ben no loron manas,” dehan sekretariu estadu ne’e iha nia mensajem ba vitima sira.

Ermelinda Soares Araujo nu’udar reprezentante vítima insendiu husi Munisipiu Ermera hateten katak sira orgullu ho apoiu ne’ebe sira hetan nune sira bele fila ba sira nia munisípio.

“Ami hela iha ne’e fulan 10 ona maske iha nee be’e mos la dun sufisiente, maibe ami bele aguenta no kontente tebes ho apoiu ne’ebe ohin ami hetan ona no ami sei fila ba ami nia munisípio no ami promete katak karik ami fan material ne’ebe Governo fo Lei sei kondena ami,” nia dehan.

Governante esplika apoiu rekoprasaun kompostu hosi pregu, semente, besi, arame, kalen, besi kotak, balde ho materiál pakote kompletu ba uma ida nian, ho osan montante 1.000 tuir lei númeru 7/2020, osan ne’e uza item rua, ida ba mão de obra no ida ba kustu transporte, ho apoiu hahan ba kada família 50 kilo.

Inséndiu Tasitolu akontese iha 26 Fevereiru 2023, família uma kain 50 mak afeita, enkuantu uma kain 30 resin evakua ba kobe house iha Palásiu Prezidesiál Aitarak-Laran, uma kain 11 ba Tasitolu, Karantina.