Anin Bo’ot Estraga Uma Komunidade 19 iha Munisipiu 8

DILI, www.news-viptv.com – Iklima anin bo’ot ne’ebe akontese durante periodu 8 to’o 15 Jullu 2024, estraga uma komunidade nian 19 ne’ebe akontese iha munisipiu 8.

Iha atualizasaun dadus dezastre ne’e, Autoridade Protesun Civil (APC) rejista uma ne’ebe hetan estagus tamba anin bo’ot akonetse iha Aileu uma 1, Bobonaro 2, Baucau 4, Ermera 1, Manatuto 2, Liquisa 3, RAEOA 1, no Viqueque 5.

“APC rejista kazu tipu dezastre hamutuk 25 mak hanesan anin boot, rai halai, númeru uma estragus mak 20, númeru ema afetadu hamutuk ema 85,” hateten Portavoz APC, Nelson Orleans Nunes, ba jornalista sira (15/7/2024), iha edifisiu APC Kaikoli, Dili.

Alende uma 19 ne’ebe hetan estragu, APC mos rejista uma 6 ne’ebe mos estraga tamba rai halai ne’ebe akontese iha Ermera hamutuk uma 5 no Manatuto 1. Iha Ermera akontese iha Postu Hatolia B, Suku Urahou, Aldeia Kapterloa. No Manatuto akonetese iha Postu Administrasaun Laklo, Suku Lakumesa, Aldeia Hatukona.