Hosi EUA, PR Horta Sei Vizita Kambodia, Portugal no Singapura

DILI, www.news-viptv.com – Prezidenti Republika (PR) Jose Ramos-Horta sei halo vizita tan ba Kambodia, Portugal no Singapora hafoin fila hosi nia vizita estadu hosi Estadu Unidos Amerikanu (EUA).

Vizita xefi etsadu ba nasaun tolu ne´e, PR Horta informa wainhira hato´o deskursu iha reuniaun plenária solene ba abertura sesaun dalima kinta legislatura, Kinta (15/9/2022) iha uma fukun Parlamentu Nasional.

“Ha’u sei buka atu hetan permisaun hosi Parlamentu ida-ne’e hodi vizita Kambodia tuir konvite Sua Majestade Liu-Rai nian. Ita-nia belun konfiavel Primeiru Ministru Hun Sen, ne’ebé asumi prezidénsia rotativa ASEAN nian, sai tiha ona advogadu ativu ba Timor-Leste nia sai-membru iha organizasaun rejionál importante ida-ne’e. Vizita ne’e sei sai nu’udar oportunidade ida atu esplora komérsiu no oportunidade sira investimentu nian, partikularmente iha setór agricultura,” deklara PR Horta.

Hafoin tiha vizita Kamboja, xefi estadu ne´e mos husu permisaun ba Parlamentu Nasional hosi hodi halo vizita Estadu ida ba Portugál.

“Ho konvite hosi ita-nia belun distintu Prezidente Marcelo Rebelo Sousa. Ha’u mós sei partisipa hanesan oradór prinsipál iha Simeira kona-ba Web globál iha Lisboa, nu’udar eventu ida ne’ebé iha espetativa atu iha Delegasaun na’in 65.000 marka prezensa fizikamente,” xefi estadu informa.

Iha semana dahuluk fulan dezembru, ema numeru ida iha Timor-Leste neé mos mos planu ona atu halo vizita ofisiál ida ba Singapura hanesan resposta ba konvite murak hosi Prezidente Singapura.

“Singapura sai tiha ona belun no parseiru ida ne’ebé firme no ha’u iha intensaun atu esplora liután investimentu sira Singapura nian iha Timor-Leste,# dehan xefi estadu.

Liu hosi komérsiu no investimento, Timor-Leste habelar daudaun no haklean daudaun nia integrasaun ekonómika rejionál.

“Tanba nesesidade, tanba impozisaun jeografia no opsaun estratéjika, kontinua atu esplora avenida sira hotu ba integrasaun ekonómika rejionál. Iha prinsípiu tinan 2023 Timor-Leste sei hetan asesaun WTO nian, nu’udar estensaun natural ida ba ita-nia rain nia integrasaun ekonómika globál no rejionál,” dehan xefi estadu.

Nia hatutan, asesaun sira ba ASEAN no WTO ne’e orientada hosi Timor-Leste nia interese ekonómika rasik, hanesan porezemplu prosesu reforma ekonómika doméstika hodi garante ambiente posivel ne’ebé saudavel ba investór nasionál no estranjeiru sira no diversifikasaun ba ita-nia ekonomia.

Aleinde Integrasaun ekonómika, asesaun ba ASEAN ne’e nu’udar imperativu estratéjiku ida. ASEAN ne’e sai importante ba Timor-Leste nia estabilidade no prosperidade, nune’e mós pás no prosperidade iha Timor-Leste tenke sai kestaun ba ASEAN.

Iha 23 Setembru, PR Horta sei partisipa iha Asembleia Jerál ONU nian, no seo halo diskursu ba Plenária. Alende ne´e, xefi estadu mo sei hato’o diskursu mós iha sesaun espesiál ida kona-ba Komisaun Harii Pás iha loron 26 Setembru.

Antes ne´e, PR Horta halo ona vizita estadu dahuluk iha Indonesia hodi hasoru malu ho Prezidenti Joko Widodo.

Hafoin Indonesia, Australia sai nasaun daruak ne´ebe PR Horta halo vizita estadu ba foin lalais ne´eiha 6-11 Setembru 2022.