Maski Lakon, CONTL Orgullu ba Prestasaun Atleta Olimpiku

DILI, news-viptv.com – Commite Olympic Nasional Timor-Leste (CONTL) orgullu nafatin ba prestasaun atleta olimpiku Timor-Leste ne’ebe kompete iha Olympic Games 2020 Tokyo, maski ho rezultadu lakon.

“Durante partisipasaun atleta sira iha jogu Olympic Tokyo di’ak tebe-tebes, tanba atleta sira konsege hatudu prestasaun di’ak iha momentu ne’eba mezmu la hetan klasifikasaun,” dehan Mateus da Cruz ba jornalista sira iha konferensia imprensa, Sexta (13/08/2021), iha Sede CONTL, Dili.

Iha Olympic Games Tokyo, Timor-Leste haruka nia atleta nain 3 maka nain rua hosi modalidade natasaun maka Imelda Felycita Belo ho Jose da Silva Viegas ne’ebe kompete iha numeru freestyle metru 50.

Laurentino Guterres nudar Prezidenti Federasaun Natasaun Timor-Leste senti kontenti ho rezultadu ne’ebe nia atleta sira halo foin lais ne’e, maski la manan medalla.

“Ita lakon tamba laiha fasilidade treinu ba sira, federasaun iha kontaktu ona federasaun internasional ne’ebe prontu konstrui pisina ho standar internasional, maibe federasaun sei hein resposta hosi estadu kona ba rai ne’ebe sei fo hodi harii pisina ne’e,” informa Laurentino Guterres.

Iha modalidade atletismu, atleta Felisberto de Deus, maski lakon konsege halo rekor nasional foun ba nia an rasik iha numeru metru 1.500. Rekor nasional foun ne’ebe nia halo ba nia an maka ho durasaun tempu 3:51:03 minutus.

“Hau orgullu no agradese ba estadu bele joga iha jogu olimpiku,” komentariu Felisberto.